Ár rottunnar bjargar ekki rottunum í Peking

Rotturnar í Peking njóta þess ekki á nokkurn hátt að nú sé ár rottunnar gengið í garð. Yfirvöldum í borginni er mjög í mun að halda henni hreinni og fínni á Ólympíuárinu og því eru borgarbúar eindregið hvattir til þess að drepa nagdýrin hvar sem til þeirra næst.

Áhersla er lögð á að halda rottunum frá því svæði þar sem leikarnir fara fram og fylgjast fulltrúar heilbrigðiseftirlitsins með því að borgarbúar standi sína plikt og sekta þá sem ekki leggja sitt af mörkum.

Þá verður rottueitri dreift á sjúkrahúsum, hótelum, veitingastöðum og mörkuðum. Þessar aðgerðir eru hluti af því markmiði að gera hreinsa stræti Peking og nú þegar eru átök í gangi sem miða að því að fá fólk til að hætta að hrækja, hætta að troða sér fram fyrir í röð auk þess sem lagt er að Pekingbúum að hegða sér vel á íþróttakappleikjum.