Latibær fær lýðheilsuverðlaun

Magnús Scheving hlaut í gær Norrænu lýðheilsuverðlaunin árið 2004 og afhenti Jón Kristjánsson heilbrigðisráðherra honum verðlaunin við hátíðlega athöfn á Egilsstöðum. Magnús hlaut verðlaunin fyrir Latabæ og þar með fyrir framlag sitt til bættrar lýðheilsu á Norðurlöndum. Verðlaunin hafa verið veitt í fimmtán ár af Norræna lýðheilsuskólanum í Gautaborg fyrir hönd Norrænu ráðherranefndarinnar. Í rökstuðningi dómnefndar segir að offituvandi norrænna barna aukist með hverju árinu en Magnús hvetji börn til að temja sér heilsusamlega lífshætti og hafi bætt heilsu barna með nýstárlegum hætti.