Ófært að miða hlunnindaskatt miðað vð bílverð í dag

Það er algjörlega ófært og í andstöðu við stefnu ríkisstjórnar, um að koma til móts við heimilin í landinu, að uppreikna hlunnindaskatt af bifreiðum miðað við verðlista bifreiðaumboðana eins og hann er í dag. Þetta segir Özur Lárusson, framkvæmdastjóri Bílgreinasambandsins, í bréfi sem hann hefur sent fjölmiðlum. Þar segir Özur að Ríkisskattstjóri hafi sent öllum bifreiðaumboðum landsins bréf þar sem óskað er eftir uppfærðum verðlistum á nýjum bílum. Tilgangur Ríkisskattstjóra með þessu bréfi sé að uppfæra þann grunn sem hlunnindaskattur er reiknaður útfrá í þeim tilfellum sem launþegi hefur afnot af bifreið frá vinnuveitanda sínum.

Özur bendir á að enginn kaupi bifreiðar á því verði sem birtist í verðlistum eins og sölutölur sýni, hvorki fyrirtæki né einstaklingar. Verð á nýjum bílum í dag hafi hækkað á bilinu 40 til 60% vegna stöðu krónunnar.

„Ef Ríkisskattstjóri fer þá leið að miða við verðlista bifreiðaumboðana eins og hann lítur út um þessar mundir mun það hafa í för með sér allt að tvöföldun á þeim skatti sem nú er innheimtur af aðilum er hafa bifreið sem hluta af kjörum sínum hjá vinnuveitanda," segir Özur

Hann bendir á að Ríkisskattstjóri uppfæri þennan verðgrunn sinn einu sinni á ári þannig að allt næsta ár muni þeir aðilar sem hafi bifreiðar til umráða frá vinnuveitanda greiða hlunnindaskatt miðað við verð á bílum sem engin keypti eða mun kaupa. Það muni hafa mikil og neikvæð áhrif á fjárhag þeirra heimila sem hafa hluta af kjörum sínum í gegnum bifreiðaafnot.

Bílgreinasambandið bendir á að eðlilegra sé að miða við verð eins og það var um síðustu áramót og að þessi grunnur verði endurskoðaður um mitt næsta ár nái gengi íslensku krónunnar eðlilegum stöðugleika.