Messan: Vonbrigði að sjá Pochettino bregðast svona við

Tottenham tapaði nokkuð óvænt fyrir Burnley í ensku úrvalsdeildinni um helgina. Sérfræðingar Messunnar á Stöð 2 Sport ræddu leikinn í þætti gærkvöldsins.

„Burnley þeir eru búnir að fara back to basics. Mér fannst svona aðeins í byrjun tímabils að þeir ætluðu að gera eitthvað of mikið,“ sagði Ríkharður Daðason.

„Nú eru þeir bara komnir aftur í það að ætla að láta vera erfitt að spila við sig.“

Mauricio Pochettino var ansi reiður í leikslok því fyrra mark Burnley kom úr hornspyrnu sem Burnley hefði líklega ekki átt að fá. Hann sá titilbaráttuna líklega hverfa með þessum töpuðu stigum.

„Hún er líklega farin. Þetta er í fyrsta skipti sem maður sá hann svona reiðann og maður veit bara ekki, er hann að rífast yfir þessari hornspyrnu?“

„Hún kom snemma í seinni hálfleik og þú gast alveg unnið þennan leik. Þú tapaðir ekki leiknum á þessari hornspyrnu og mér fannst það svona pínu vonbrigði að sjá hann þarna.“

„En ég er alveg sammála því sem hann sagði fyrir leikinn að þeir urðu að vinna þennan leik.“