Innlent

Gullinbrú lokað vegna áreksturs strætó og flutningabíls

Stefán Ó. Jónsson skrifar
Strætisvagninn hafnaði á staur.
Strætisvagninn hafnaði á staur. Vísir/JKJ

Strætisvagn og gámaflutningabíll rákust saman á Gullinbrú um klukkan tvö. Brúnni hefur verið lokað í suðurátt meðan unnið er að á svæðinu.

Samkvæmt upplýsingum frá slökkviliðinu fór strætisvagninn út af veginum, eins og sjá má myndinni hér að ofan. Vagninn er „verulega tjónaður“ og hefur töluverður vökvi lekið úr honum, að öllum líkindum kælivökvi. Engan eld sé þó að sjá í vagninum. Gert er ráð fyrir að draga þurfi vagninn af vettvangi.

Enginn farþegi virðist hafa slasast alvarlega því að sögn slökkviliðs gátu allir farþegarnir, sem voru á annan tug talsins, yfirgefið vagninn af sjálfsdáðum. Sömu sögu er að segja af bílstjóra gámaflutningabílsins.

Bernódus Sveinsson, aðstoðarvarðsstjóri hjá slökkviliðinu, segir að þó hafi verið ákveðið að flytja tvo farþega á slysadeild til skoðunar. Meiðsl þeirra væru þó ekki stórvægileg.

Gullinbrú hefur verið lokað til suðurs sem fyrr segir. Erfitt er að segja til um það á þessari stundu hversu lengi sú lokun mun vara en Bernódus býst þó ekki við öðru en að opnað verði aftur fyrir umferð fljótlega. Gullinbrú er þó áfram opin til norðurs.

Fréttin var uppfærð klukkan 14:45.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.