United á enn góða möguleika að ná í Maguire

Það logar heldur betur enn í vonarglætum Manchester Untied um að ná í enska miðvörðinn Harry Maguire samkvæmt heimildarmanni Sky Sports sem stendur nálægt viðræðum félaganna.

United er komið skrefi framar en nágrannarnir í Manchester City í baráttunni um Maguire eftir að hafa gert 70 milljón punda tilboð. Áður höfðu bæði lið sagst tilbúin að greiða 65 milljónir punda fyrir leikmanninn.

Leicester hefur hins vegar látið það í ljós að það sé ekki viðunandi kaupverð, sérstaklega eftir að United borgaði 50 milljónir punda fyrir Aaron Wan-Bissaka, leikmann sem í augum Leicester er ekki nálægt því að vera á sama stalli og Maguire.

Maguire á enn fjögur ár eftir af samningi sínum hjá Leicester og þarf eigandi félagsins, Aiyawatt Srivaddhanaprabha, að samþykkja og skrifa undir samkomulag til þess að enski miðvörðurinn geti farið annað.