Innlent

Hundrað ára heiðursfólk fagnaði lífinu

Kolbeinn Tumi Daðason skrifar
Forsetahjónin ásamt ellefu manns sem fagna 100 ára afmæli á árinu.
Forsetahjónin ásamt ellefu manns sem fagna 100 ára afmæli á árinu.
Fjölmenni var samankomið á Hrafnistu í Hafnarfirði í dag þegar boðið var til veislu til heiðurs þeim sem fagna eitt hundrað ára afmæli á árinu. Guðni Th. Jóhannesson, forseti Íslands, var á meðal gesta og ávarpaði samkomuna. Það gerði líka Dagný Erla Gunnarsdóttir, fimmtán ára stúlka sem sat þingfund ungmenna á Alþingi í gær.

Boðið var upp á afmælisköku og Gissur Páll Gissurarson tenór söng fyrir gesti. Öllum gestum á Hrafnistu var boðið í veisluna.

25 Íslendingar fagna 100 ára afmæli á þessu ári. Átján konur og sjö karlar. Flest eru afmælisbörnin búsett á höfuðborgarsvæðinu. Þeir afmælisgestir sem mættu til viðburðarins stilltu sér upp á hópmynd með forsetahjónunum.

Þetta er í fyrsta sinn sem Hrafnista býður landsmönnum til 100 ára afmælisveislu ásamt forseta Íslands og er ætlunin að þetta verði árlegur viðburður. Var undirbúningur m.a. unninn í samstarfi við Jónas Ragnarsson sem allt frá árinu 2006 hefur haldið úti vefsíðu um langlífa Íslendinga, haldgóð hjónabönd, stóra systkinahópa og fleira. 

Vettvangur Jónasar er nú vistaður á síðunni Langlífi á Facebook.

Fjölmennt var á Hrafnistu þar sem boðið var upp á kaffi og með því.Vísir/Vilhelm
Hlustað var á ræðuhöld og fagra tóna.Vísir/Vilhelm
Glatt á hjalla.Vísir/Vilhelm
Íbúum á Hrafnistu var öllum boðið til veislunnar.Vísir/Vilhelm
Margir voru klæddir í sitt fínasta púss.Vísir/Vilhelm
Blóm og íslenski fáninn voru á hverju borði.Vísir/Vilhelm
Jóhanna Kristín Andrésdóttir (til hægri) ásamt ömmu sinni Jóhönnu Björg Hjaltadóttir sem verður 100 ára þann 17. ágúst.Vísir/Vilhelm
Guðni skar afmæliskökuna og naut góðrar aðstoðar.Vísir/Vilhelm



Fleiri fréttir

Sjá meira


×