Tónlist

Fyrstu æfingu Hatara í Tel Aviv lokið: „Ég man ekki eftir svona góðri fyrstu æfingu“

Vésteinn Örn Pétursson skrifar
Mikið gengur á í fullkláruðu atriði Hatara.
Mikið gengur á í fullkláruðu atriði Hatara. Instagram/@eurovision

Fjöllistahópurinn og hljómsveitin Hatari, sem kemur til með að taka þátt í Eurovision fyrir Íslands hönd í Ísrael síðar í þessum mánuði, hefur lokið sinni fyrstu æfingu í Tel Aviv. Stutt myndband af æfingunni má sjá neðar í fréttinni.

Að sögn Gísla Marteins Baldurssonar sjónvarpsmanns gekk æfingin afar vel. Gísli Marteinn er meðlimur fjölmenns starfsliðs sem Ríkisútvarpið sendi til Ísrael.

„Þessi fyrsta æfing er aðallega til þess að fá tilfinningu fyrir sviðinu. Hvernig hljóð, dans, leikmynd og myndavélar hafa lært á atriðið í gegn um þær leiðbeiningar sem við höfum sent þeim,“ sagði Gísli í samtali við fréttastofu og bætti við að hann ræki ekki minni til þess að svona góður árangur hafi náðst á fyrstu æfingum íslenskra Eurovision-atriða í gegn um tíðina.

Sjá einnig: „Hatrið hefur yfirgefið landið“ og lagt af stað til Tel Aviv

Gísli sagði fyrsta rennsli lagsins „Hatrið mun sigra,“ eins og lag Hatara heitir, hafa hlotið einróma lof blaðamanna á svæðinu.

Aðspurður út í breytingar á atriðinu frá því sem sást hér í Söngvakeppni sjónvarpsins, sem sker úr um hver tekur þátt í Eurovision fyrir Íslands hönd, sagði Gísli þær ekki vera miklar.

„Það er ekki mikil breyting á atriðinu. Það sem kemur á skjáina fyrir aftan hljómsveitina, það er aðeins búið að breyta þeim myndum,“ segir Gísli. Hann segir atriðið í grunninn vera eins og það atriði sem vann keppnina hér á Íslandi.

Þó sé búið að bæta einum leikmun við atriðið.

„Það er hnöttur sem trommugimpið stendur ofan á, eða inni í.“

Ekkert bólar á yfirlýsingu Hatara

Blaðamaður spurði Gísla út í fyrirhugaða yfirlýsingu Hatara, en hljómsveitin hafði gefið það út að von væri á yfirlýsingu frá sveitinni eftir að til Ísrael yrði komið. Kvaðst Gísli engin svör geta veitt við slíkum fyrirspurnum.

„Vegir Hatara eru órannsakanlegir, þannig að það getur allt gerst.“

Hér að neðan má sjá YouTube myndband opinberrar rásar Eurovision af æfingunni.



Tengdar fréttir

Iceland Music News fylgir Hatara eftir í Ísrael

Fréttamiðillinn Iceland Music News birti í dag fyrsta þátt sinn af tuttugu þar sem fjallað verður um Eurovision í Ísrael og þátttöku íslensku hljómsveitarinnar Hatara í keppninni en eins og kunnugt er flytja þeir framlag Íslendinga í ár, lagið Hatrið mun sigra.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.