Klopp: Þetta var skrýtinn leikur

Jurgen Klopp, stjóri Liverpool, var ekki í skýjunum með markalausa jafnteflið gegn Manchester United á Old Trafford í dag.

„Þetta var skrýtinn leikur. Við byrjuðum mjög vel og byrjuðum í raun nákvæmlega eins og við vildum gera. Öll þessi meiðsli höfðu mikil áhrif á leikinn og við náðum ekki að halda taktinum gangandi,“ segir Klopp.

Liverpool tyllti sér á topp ensku úrvalsdeildarinnar með þessu jafntefli en þrátt fyrir það var Klopp ekki mjög glaðbeittur í leikslok.

„Þetta eru tvö töpuð stig fyrir okkur. Við erum með einu stigi meira en fyrir leikinn en okkur líður samt ekki þannig,“ segir Klopp.

Viðtalið við Klopp má sjá í heild sinni efst í fréttinni.