Rüdiger: Chelsea á að skammast sín

Antonio Rüdiger segir Chelsea eiga að skammast sín fyrir fjögurra marka tap liðsins fyrir Bournemouth í vikunni. Varnarmaðurinn var ekki sáttur með frammistöðu liðsins.

Chelsea tapaði 4-0 á Vitality vellinum á miðvikudag og var þetta aðeins í annað skiptið í sögunni sem Chelsea tapar með fjórum mörkum í úrvalsdeildinni, það gerðist síðast fyrir 22 árum síðan.

„Það þurfa allir að skammast sín fyrir hvað gerðist í síðasta leik,“ sagði Þjóðverjinn.

„Það geta allir tapað leik, en það er mikilvægt hvernig við töpum. Við sköpuðum ekkert í seinni hálfleik, N'Golo Kante átti hálffæri og það var allt sem við gerðum.“

„Við gerðum þeim allt of auðvelt fyrir.“

Chelsea datt niður í fimmta sæti deildarinnar en getur klifrað aftur upp í fjórða sætið, í það minnsta tímabundið, með sigri á Huddersfield í dag.

„Við segjumst vera topplið, en þetta má ekki gerast. Við verðum að halda haus.“

„Við þurfum að finna stöðugleika, eins og er eru allt of mikið af hæðum og lægðum.“