Wolves í viðræðum um liðsfélaga Birkis

Wolves hefur áhuga á að kaupa liðsfélaga Birkis Bjarnasonar og er í samningaviðræðum við Chelsea samkvæmt frétt SkySports.

Sóknarmaðurinn Tammy Abraham hefur farið á kostum með Aston Villa í vetur þar sem hann er á láni frá Chelsea. Abraham hefur skorað 16 mörk til þessa á tímabilinu og er á óskalista margra toppliða.

Enskir fjölmiðlar greindu frá því að Chelsea væri búið að samþykkja 18 milljóna punda tilboð en Sky segir viðræðurnar ekki vera komnar svo langt á veg.

„Chelsea er mjög ánægt, hann er að þroskast sem leikmaður og skorar mörk. Þetta er sigur fyrir alla þrjá aðila svo ég væri hissa ef eitthvað kæmi í veg fyrir að hann spilaði áfram hjá Villa,“ sagði Dean Smith, stjóri Aston Villa eftir leik Villa og QPR á Nýársdag.