Hreindís Ylva nýr formaður Ungra vinstri grænna

Hreindís Ylva Garðarsdóttir Holm var kjörin nýr formaður Ungra vinstri grænna á landsfundi hreyfingarinnar sem fram fór í Hafnarfirði um helgina.

Í fréttatilkynningu segir að Hreindís Ylva hafi verið kosin með öllum greiddum atkvæðum. „Hreindís er leik- og söngkona að mennt og hefur starfað við leiklist og söng auk kennslu í báðum fögum. Hún býr í Reykjavík og var í fjórða sæti á lista VG fyrir borgarstjórnarkosningarnar í vor.

Hún tekur sæti í stjórn UVG í fyrsta skipti. Aðrir sem taka sæti í stjórn eru blanda nýrra og reynslumeiri stjórnarmeðlima. Í Ungum vinstri grænum eru starfandi tvær stjórnir; framkvæmdastjórn sem sér um daglegan rekstur hreyfingarinnar og landstjórn sem er æðsta vald milli landsfunda.

Eftirfarandi aðilar taka sæti í stjórnum:

Framkvæmdastjórn:

Hreindís Ylva Garðarsdóttir Holm, formaður

Andrea Ósk Sigurbjörnsdóttir

Dagrún Ósk Jónsdóttir

Elva Hrönn Hjartardóttir

Ólína Lind Sigurðardóttir

Sigrún Birna Steinarsdóttir

Þórólfur Sigurðsson

Landsstjórn:

Ester Helga Harðardóttir

Eyrún Þórsdóttir

Gyða Dröfn Hjaldadóttir

Helgi Hrafn Ólafsson

Hrefna Rós Helgadóttir

Valgerður Bláklukka Fjölnisdóttir

Þórhildur Heimisdóttir

Fundurinn var einstaklega ánægjulegur og fróðlegur og fór vel fram. Gestir fundarins voru Þórunn Ólafsdóttir sem fjallaði um friðarmál, rasisma og um stöðu hælisleitenda og flóttafólks á Íslandi, Elva Dögg Ásudóttir Kristinsdóttir sem fjallaði um kynbundið ofbeldi, gerendur og úrræði og Guðmundur Ingi Guðbrandsson, umhverfisráðherra sem fjallaði um stöðuna í umhverfismálum og verkefnin framundan þar.

Einnig fór fram málefnavinna og meðfylgjandi eru ályktanir fundarins sem fjalla meðal annars um ríkisstjórnarsamstarfið, virkjun Hvalár, hvalveiðar á Íslandi, verlferðarþjónustu, Atlantshafsbandalagið og fleira,“ segir í tilkynningunni.