Solskjær hvetur De Gea og Martial til að skrifa undir langtímasamning

Ole Gunnar Solskjær, stjóri Man Utd, hyggst beita sér fyrir því að David De Gea og Anthony Martial skrifi undir langtímasamninga við enska stórveldið.

Félagið nýtti sér ákvæði í samningum beggja leikmanna og framlengdi samninga þeirra til ársins 2020 en Man Utd vill fá leikmennina til að skrifa undir langtímasamning og hafa viðræður þess efnis átt sér stað á undanförnum vikum.

Solskjær mun ræða við De Gea og Martial og bendir Norðmaðurinn á að það séu ekki margir staðir í fótboltanum betri til að vera á en hjá Man Utd.

„Ég veit að félagið vill framlengja við þá því þetta eru leikmenn í hæsta klassa. Þetta er undir leikmönnunum komið en þegar þú ert hjá Man Utd er grasið sjaldnast grænna hinumegin. Þú ert á besta stað sem mögulegt er. Þetta er stærsta félag heims,“ segir Solskjær.

Solskjær vonast til að leikmennirnir sjái tækifæri í að komast í guðatölu á Old Trafford en það þekkir Solskjær sjálfur vel eins og sést hefur á þeim móttökum sem hann fær frá stuðningsmönnum félagsins.

„Ég vona að ég geti hjálpað þeim og sýnt þeim fram á afhverju þeir ættu að vera áfram hjá þessu félagi. Þegar þú ert fastamaður hjá Manchester United tel ég að þú ættir að nýta það tækifæri til að skrá þig á spjöld sögunnar hjá félaginu,“ segir Solskjær.