Þjálfunarstyrkir nema hjá Fjölsmiðjunni hækka

Borgarráð samþykkti í dag að hækka þjálfunarstyrki hjá Fjölsmiðjunni en Fjölsmiðjan er vinnusetur fyrir ungt fólk sem hefur flosnað upp úr námi eða hefur ekki náð fótfestu á vinnumarkaði.

Fjölsmiðjan er sjálfseignarstofnun en sveitarfélögin á höfuðborgarsvæðinu, Atvinnuleysistryggingarsjóður og menntamálaráðuneytið leggja henni til rekstrarfé. Reykjavíkurborg ásamt Samtökum sveitarfélaga á höfuðborgarsvæðinu endurnýjaði í lok október samning við smiðjuna til þriggja ára.

Lögð er áhersla á að þeir nemar sem starfa í Fjölsmiðjunni fari þaðan hæfari til að taka þátt á almennum vinnumarkaði. Einnig á starfið að bæta félagslega- og námslega hæfni einstaklingsins. Á síðasta ári fór yfir helmingur nemenda Fjölsmiðjunnar í nám eða vinnu þegar þau luku veru sinni í smiðjunni.

Árið 2018 fá nemendur á aldrinum 16-17 ára greitt 131.635 krónur á mánuði en nemendur 18 ára og eldri fá 179.502 krónur á mánuði.