Ók af vettvangi eftir árekstur við mótorhjól

Lögreglan á höfuðborgarsvæðinu leitar ökumanns lítils rauðs bíls sem ekið var á bifhjól í Melatorgi í vesturbænum í gærkvöldi. Nánar tiltekið á mótum Hringbrautar og Suðurgötu. Tilkynning um slysið barst lögreglu kl. 19.39.

Ökumaðurinn ók rakleiðis af vettvangi og skeytti í engu um afdrif ökumanns bifhjólsins, sem var fluttur með sjúkrabíl á Landspítalann til aðhlynningar, samkvæmt tilkynningu frá lögreglunni.

„Við atvik eins og þetta er mikilvægt að ökumenn gangi úr skugga um að engin meiðsl hafi hlotist af né að skemmdir hafi orðið. Sömuleiðis er áríðandi að tilkynna málið til lögreglu, ekki síst vegna þess að áverkar eru ekki alltaf sjáanlegir á vettvangi. Lögreglan biður umræddan ökumann rauða bílsins um að gefa sig fram en hafi aðrir orðið vitni að slysinu eru hinir sömu beðnir um að hafa samband í síma 444 1000. Upplýsingum um málið má sömuleiðis koma á framfæri í tölvupósti á netfangið jonatan.gudnason@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.“