Gekk blóðugur inn á lögreglustöð

Blóðugur maður gekk inn á lögreglustöðina á Hringbraut í Reykjanesbæ á fimmta tímanum í dag. Kvaðst hann hafa verið stunginn með hnífi. Lögreglan segir manninn ekki hafa verið lífshættulega særðan og að líðan hans sé eftir atvikum.

Í tilkynningu frá lögreglunni á Suðurnesjum segir að lögreglumenn og sérsveitarmenn hafi verið sendir á vettvang í þeim tilgangi að finna og handtaka árásarmanninn.

Hann var yfirbugaður skömmu síðar og handtekinn.

Lögreglan segir málið í rannsókn og að ekki verði frekari upplýsingar veittar að svo stöddu.