Ekkert nám í boði á Hólmsheiði

Fjölbrautaskóli Suðurlands (FSu) er hættur að sinna menntun fanga á Hólmsheiði og liggur kennsla þar niðri. Skólinn freistar þess að ná samningi við menntamálaráðuneytið um aukið fjármagn. Verzlunarskóli Íslands er jákvæður fyrir því að hlaupa í skarðið, fái kennarar frá skólanum að koma þangað inn.

„Þetta er bara tímabundið en stendur til bóta, það er verið að ganga frá samningi við menntamálaráðuneytið og það verður boðið aftur upp á nám á Hólmsheiði í janúar,“ segir Lóa Hrönn Harðardóttir, námsráðgjafi fanga við FSu.

Fjölbrautaskólinn er móðurskóli fangakennslu og fær um það bil 50 milljónir á ári til þess verkefnis, samkvæmt samningi við mennta- og menningarmálaráðuneytið.

Kennt var á Hólmsheiði alla síðustu vorönn en ákveðið var að bjóða ekki kennslu á yfirstandandi haustönn. 

„Við fórum af stað með kennsluna síðasta vetur þótt þessi samningur væri ekki frágenginn, en ákváðum að fara ekki af stað núna í haust,“ segir Lóa Hrönn, og bætir við: „Það á ekki að vera þannig að nýtt fangelsi sé opnað og veggirnir byggðir án þess að gert sé ráð fyrir starfi innan þess. Það er ástæða þess að við ákváðum að fara ekki af stað fyrr en þetta er frágengið.“ 

Lóa Hrönn segir að ítarlegri greinargerð hafi verið skilað um framtíðarsýn skólans á námið. „Okkar framtíðarsýn á menntun fanga, og við viljum bara að það sé skýr rammi utan um þetta starf og það sé ekki með einum hætti þessa önnina og með allt öðrum hætti þá næstu.“

Guðmundur Ingi Þóroddsson, formaður Afstöðu, félags fanga, hefur gagnrýnt Fjölbrautaskóla Suðurlands og segir framlag hans ekki í takt við fjármagnið sem skólinn fær fyrir að sinna þessu hlutverki.

„Það er ótækt að fangar sitji aðgerðarlausir uppi á Hólmsheiði til að skapa þrýsting á aukið fjármagn til Fjölbrautaskóla Suðurlands,“ segir Guðmundur. „Ég hafði þess vegna samband við annan skóla til að kanna möguleika á að aðrir sinni þessu á meðan, enda hef ég fundið að margir skólar hafa áhuga á menntamálum fanga.“

„Guðmundur Ingi hafði samband við okkur í gær [fyrradag] og var að kanna þessa möguleika og hvort við gætum boðið upp á eitthvað, til dæmist tengt sjálfsstyrkingu. Við tókum bara jákvætt í þetta og erum reiðubúin að skoða það,“ segir Ingi Ólafsson, skólastjóri Verzlunarskóla Íslands, og bætir við: „Það voru á tímabili nokkrir fangar í fjarnámi hjá okkur og við höfum lýst því yfir og sagt að það strandi ekki á okkur að senda kennara í staðbundnar lotur í fangelsunum ef því er að skipta.“

Í svari menntamálaráðuneytisins við fyrirspurn Fréttablaðsins kemur fram að unnið sé að þarfagreiningu fyrir kennslu á Hólmsheiði. Ráðuneytinu sé kunnugt um framangreind sjónarmið Afstöðu, en ekki hafi komið til tals innan ráðuneytisins að fela öðrum skólum hlutverk í fangelsum landsins.