Gleðin sveif yfir taflborðum á jólaskákmótinu á Kleppi

Gleðin sveif yfir vötnum og taflborðum á árlegu jólaskákmóti Hróksins og Vinaskákfélagsins á Kleppi í vikunni. Á mótinu leiddu saman hesta sína skáksveitir geðdeilda, búsetukjarna og sambýla.

Úrslit voru algjört aukaatriði á mótinu en það var skáksveitin Vin Z sem stóð uppi sigurvegari. Sigursveitin var skipuð liðsmönnum frá Vin og Bríetartúni. Í öðru sæti varð sveit Geysis og Vin X hreppti bronsið. Alls voru keppendur á mótinu um 20.

Að því er segir í fréttatilkynningu á jólaskákmót Hróksins og Vinaskákfélagsins sér langa sögu og er einn af hápunktum starfsársins hjá þessum skákfélögum, sem bæði leggja mikið upp úr því að efla skáklíf meðal fólks með geðraskanir. Vinaskákfélagið er með vikulegar skákæfingar á heimavelli sínum, Vin -- fræðslu- og batasetri, Hverfisgötu 47, og þar er teflt flesta daga, og eru allir hjartanlega velkomnir.

Heiðursgestur á jólaskákmótinu var Henný Níelssen sem undanfarin misseri hefur í sjálfboðavinnu stýrt fatasöfnun Hróksins í þágu barna og ungmenna á Grænlandi.