Reyndi að smygla 78 kartonum af sígarettum til landsins

Tollverðir í Flugstöð Leifs Eiríkssonar lögðu hald á 78 kartonum af sígarettum sem karlmaður á þrítugsaldri reyndi að smygla inn í landið fyrr í mánuðinum.

Í tilkynningu frá tollstjóra segir að maðurinn hafi verið að koma frá Kaunas í Litháen þegar hann var stöðvaður við hefðbundið eftirlit.

„Sé miðað við meðalútsöluverð á sígarettum í dag nemur verðmæti smyglvarningsins nærri einni milljón króna.

Fimm flugfarþegar til viðbótar hafa orðið uppvísir að því að reyna að smygla tóbaki inn í landið á undanförnum vikum en ekki í nándar nærri eins miklum mæli og fyrrgreindi einstaklingurinn,“ segir í tilkynningunni.