Ekki einn einasti fagmenntaður í stórum byggingarverkefnum

Félag iðn- og tæknigreina hefur í skoðunum sínum á fagþekkingu starfsfólks í iðnaði oft á síðustu árum komið að framkvæmdum þar sem enginn er skráður með fagþekkingu.

Hilmar Harðarson, formaður félagsins, skrifaði um málið í fréttabréfi félagsins sem kom út nú fyrir skömmu. „FIT hefur þannig mörg dæmi um stór verk þar sem ekki finnst einn einasti fagmenntaður iðnaðarmaður að störfum.“ Einnig segir hann í grein sinni að „fáir kaupendur yrðu væntanlega að íbúðum í stórhýsum ef þeir yrðu upplýstir um að fagmenntaðir iðnaðarmenn hefðu hvergi komið þar nærri.“

Þegar Hilmar er spurður út í þetta segir hann að FIT hafi í skoðunum sínum hingað og þangað fundið þó nokkuð mörg dæmi á síðustu árum þar sem þeir finna ekki nokkurn skráðan iðnaðarmann í stórum sem litlum verkefnum. Gerðar eru þær kröfur að menntaður iðnaðarmaður sé í öllum verkum og innan handar og að meistari sé skrifaður fyrir verki.

„Já það eru þó nokkur dæmi sem við höfum séð. Okkar verkefni sem ber heitið Einn réttur – ekkert svindl, snýst einmitt um að menn hafi allt á hreinu. Ég get ekki nafngreint fyrirtæki í þessum efnum en þessar upplýsingar eru hjá Vinnumálastofnun og ég skora á að menn skoði hverjir koma erlendis frá og hvernig þeir eru skráðir,“ bætir Hilmar við.

Í október gaf Vinnumálastofnun út 164 atvinnuleyfi til útlendinga til að starfa hér á landi. Hefur stofnunin gefið út 1.546 atvinnuleyfi það sem af er árinu 2017 en það eru fleiri útgefin atvinnuleyfi en allt árið 2016.

Svo virðist sem fyrirtæki sem fá til sín erlenda starfsmenn skrái þá frekar sem verkamenn en iðnaðarmenn þótt þeir hafi iðnmenntun frá sínu heimalandi. Því veit FIT ekki hvort fyrirtæki séu með iðnaðarmenn á sínum snærum. 

„Það sem við erum að gagnrýna er að þessi fjöldi erlendra starfsmanna sem koma hingað til landsins eru langflestir skráðir verkamenn. Okkur þykir það einkennilegt. Þá þarf að greiða þeim eftir lágmarkstöxtum verkamanna en ekki iðnaðarmanna. Í raun og veru erum við að gæta hagsmuna skjólstæðinga okkar með því að skoða þessi mál náiið,“ segir Hilmar.