Lögðu hald á mikið magn lyfseðlilsskyldra lyfja

Tollverðir í Leifsstöð lagði hand á mikið magn lyfseðilsskyldra lyfja sem fjórir komufarþegar reyndu að smygla til landsins um síðustu helgi.

Í tilkynningu frá tollinum segir að hafi verið að ræða fjóra íslenska einstaklinga – þrjá karlmenn og eina konu. Tveir karlmannanna sem um ræðir voru saman á ferð og voru að koma frá Alicante. Hin komu frá Madrid og Barcelona.

„Samtals voru á þriðja þúsund töflur haldlagðar, sem fólkið hafði ýmist falið í nærklæðum sínum, ytri fatnaði og/eða í farangri. Til viðbótar reyndist einn fjórmenninganna hafa komið stórri töflupakkningu fyrir innvortis sem hann losaði sig við eftir að hann hafði verið færður á lögreglustöð. Ekki liggur fyrir hve margar töflur pakkningin hafði að geyma.

Stór hluti lyfjanna sem haldlögð voru reyndust vera sterk morfínskyld lyf og einnig var um ræða töluvert magn af sterkum örvandi lyfjum. Þessar lyfjategundir sem um ræðir eru háðar sérstöku eftirliti heilbrigðisyfirvalda og eru eftirritunarskyldar.

Á heimasíðu SÁÁ kemur fram í nýlegri úttekt að fleiri og fleiri mismunandi sérlyf, sem hafa að geyma ópíóíða eða morfínskyld efni, komi  inn á vímuefnamarkaðinn og gangi þar kaupum og sölum. Jafnframt að sjúklingar sem nota vímuefni í æð virðist nú sækja mest í svokölluð oxycodon – lyf, en nokkur hundruð töflur af þeirri  tegund voru haldlagðar um helgina,“ segir í tilkynningunni.