Segja Hveragerðisbæ brjóta á rétti sínum og sýna valdníðslu

„Við förum því vinsamlega fram á að bæjarráð dragi til baka öll áform um afturköllun lóða í eigu félagsins og staðfesti með formlegum hætti og að aftur verði teknar upp viðræður milli aðila á uppbyggilegum nótum með framtíðarhagsmuni þessa verkefnis og bæjarfélagsins alls að leiðarljósi,“ segir í bréfi sem Björn Ingi Hrafnsson, talsmaður og einn eigenda Orteka Partners á Íslandi, sendi Hveragerðisbæ í september.

Bærinn varð ekki við þessari umleitan. Nú hafa forsvarsmenn fyrirtækisins sent stjórnsýslukæru til samgöngu- og sveitarstjórnarráðuneytisins vegna ákvörðunar bæjarins um að afturkalla úthlutun á fjórum ferðaþjónustulóðum sem félagið hafði fengið undir starfsemi ferðaþjónustu í Ölfus­dal. Stjórnsýslukæran var kynnt á fundi bæjarráðs 2. nóvember.

Forsaga málsins er sú að hinn 18. ágúst 2016 samþykkti Hveragerðisbær að úthluta fyrirtækjunum lóðunum fyrir þjónustuhús, smáhýsi og gistiskála og tjaldsvæði. Hinn 15. júlí síðastliðinn var úthlutunin afturkölluð.

„Forráðamenn kærenda telja að Hveragerðisbær hafi brotið með alvarlegum hætti á rétti kæranda, m.a. með því að sýna af sér valdníðslu og virða ekki jafnræðisreglu gagnvart kæranda en að mati kæranda var Hveragerðisbæ með öllu óheimilt að afturkalla úthlutun lóðanna með þeim hætti sem gert var,“ segir í stjórnsýslukærunni.

Þá segir að félagið hafi frá síðustu áramótum verið í vinnu um gerð rammasamnings við Hveragerðisbæ varðandi lóðirnar ásamt fleiri lóðum sem bærinn hafði gefið vilyrði fyrir. „Þá var félagið búið að leggja út í tugmilljóna króna kostnað vegna hönnunar á svæðinu. Dráttur á að framkvæmdir hæfust orsakast af því að bærinn var ekki búinn að afhenda hinar lóðirnar og samningum um heildarsvæðið ekki lokið.“

Í kærunni segir líka að eftir að sveitarfélagið hafi slitið einhliða viðræðum á milli aðila um rammasamning varðandi uppbyggingu hafi kæranda verið veittur mánaðarfrestur til þess að hefja framkvæmdir. Slíkur frestur sé óeðlilega stuttur saman­borið við tímafresti annarra aðila sem hafi fengið úthlutaðar lóðir af hálfu sveitarfélagsins. Frestur til að hefja framkvæmdir sé aldrei styttri en 6 mánuðir eftir að úthlutunarhafi geti raunverulega hafið undirbúning framkvæmda.

Í fyrirtækjaskrá er Orteka Partn­ers á Íslandi skráð í eigu FjBj ehf. og Þjónustu og viðskiptamiðlunarinnar Hóls ehf., en þau fyrirtæki eru bæði skráð í eigu félagsins Maltice Ltd, sem er skráð erlendis. Brynjar Már Magnússon er skráður stjórnarformaður fyrirtækisins og Baldur Jezorski stjórnarmaður. Samkvæmt upplýsingum Fréttablaðsins er faðir Baldurs, Franz Jezorski, á meðal hluthafa.