Ætla að funda aftur um kjörgengi Kristínar

Kristín Soffía Jónsdóttir, fulltrúi Samfylkingarinnar í borgarstjórn Reykjavíkurborgar, færði lögheimili sitt frá Reykjavík til Danmerkur hinn 8. apríl 2016, samkvæmt upplýsingum úr Þjóðskrá.

Samkvæmt upplýsingum úr fundargerðum Strætó bs. gegndi hún engu að síður skyldum borgarfulltrúa 18. apríl 2016 með því að taka þátt í stjórnarfundi Strætó í gegnum síma. Hún tók aftur þátt í fundi stjórnar Strætó í gegnum síma föstudaginn 29. apríl. Þetta má lesa úr fundargerðum stjórnar fyrirtækisins.

„Þetta eru nýjar upplýsingar sem ekki lágu fyrir á sínum tíma og við vissum ekki af. Í ljósi þeirra hef ég ákveðið að boða til fundar í for­sætis­nefnd þar sem málið verður rætt og hver næstu skref verða,“ segir Líf Magneudóttir, forseti borgarstjórnar. Hún segir að ekki megi leika vafi á kjörgengi borgarfulltrúa.

Eins og Fréttablaðið greindi frá í gær leikur vafi á kjörgengi Kristínar Soffíu sem borgarfulltrúa. Í 37. grein samþykktar um stjórn Reykjavíkurborgar og fundarsköp borgarstjórnar segir: „Þegar borgarfulltrúi flytur úr sveitarfélaginu um stundarsakir má borgarstjórn ákveða, að hans ósk, að hann skuli víkja úr borgarstjórn þar til hann tekur aftur búsetu í Reykjavík. Slík ákvörðun skal tekin áður en borgar­fulltrúi flytur um stundarsakir. Sé ekki tekin ákvörðun samkvæmt þessari málsgrein missir borgarfulltrúi kjörgengi við skráningu lögheimilis í öðru sveitarfélagi.“

Eins og fram kom í Fréttablaðinu í gær hefur Helga Björk Laxdal, skrifstofustjóri Reykjavíkurborgar, gefið þær skýringar að Kristín Soffía hafi verið í fæðingarorlofi frá júní 2016 til júlí 2017. Þetta orlof hafi verið tekið í samræmi við tilkynningar hennar til Reykjavíkurborgar og fæðingarorlofssjóðs. Borgarstjórn hafi ekki aðkomu að málefnum borgarfulltrúa í fæðingarorlofi enda sitji þeir ekki í borgarstjórn á meðan á því stendur. Nýjar upplýsingar benda hins vegar til þess að Kristín Soffía hafi fært lögheimilið áður en hún hóf töku fæðingarorlofs.

Trausti Fannar Valsson, dósent í lögfræði við Háskóla Íslands, segir að það sé sveitarstjórnar að úrskurða um það hvort sveitarstjórnarfulltrúi hafi misst kjörgengi. Þeim úrskurði megi skjóta til ráðuneytis og úrskurði ráðuneytis megi skjóta til dómstóla. Ráðuneytið geti hins vegar tekið slík mál upp að eigin frumkvæði á grundvelli sveitarstjórnarlaga.