Hafliði Arnar er fundinn heill á húfi

Hafliði Arnar Bjarnason, sem lögreglan leitaði að í gærkvöldi er fundinn. Fram kemur í skeyti lögreglunnar, sem sent var á fjölmiðla nú á sjötta tímanum í morgun, að hann hafi fundist heill á húfi.

Umfangsmikil leit var gerð að honum í vesturhluta Kópavogs í gærkvöld en síðast hafði spurst til hans síðdegis í gær.

Þyrla Landhelgisgæslunnar var notuð við leitina og bátar sömuleiðis. Lögregla og björgunarsveitarfólk komu að leitaraðgerðinni þar sem ljóskastarar voru notaðir í myrkrinu.

Þóra Jónasdóttir, aðstoðaryfirlögregluþjónn hjá Lögreglunni á Höfuðborgarsvæðinu, sagði í samtali við Vísi upp úr miðnætti að óttast væri um mann og aðgerðirnar tengdust því máli.

Lögreglan vill þakka veitta aðstoð við að hafa uppi á Hafliða.