Vilja bara eina íbúð af fjörutíu

Árborg hefur aðeins áhuga á að eignast eina af þeim um það bil fjörutíu íbúðum sem Íbúðalánasjóður hefur boðið sveitarfélaginu til kaups.

Fram kemur í fundargerð bæjarráðs að flestar íbúðanna séu í útleigu. „Mikill meirihluti eignanna sem boðnar eru hentar ekki sem félagslegt leiguhúsnæði sökum staðsetningar, stærðar, aldurs og/eða viðhaldsþarfar,“ segir bæjarráð sem þó vill vita verð einnar íbúðar sem ekki er í notkun.

„Bæjarráð beinir því til Íbúða­lánasjóðs að hætta við uppsagnir á húsaleigusamningum, enda er verulegur skortur á íbúðarhúsnæði til leigu í sveitarfélaginu um þessar mundir og ljóst að þeim einstaklingum og fjölskyldum sem leigja af Íbúðalánasjóði yrði erfitt um vik að verða sér úti um annað leiguhúsnæði,“ segir í bókuninni.