Mikilvægt að veggjald fæli bílstjóra ekki frá

Ljóst er að gjaldskrá Vaðlaheiðarganga verður að vera talsvert hærri en í Hvalfirði til þess að endurheimtur lána að fullu séu raunhæfar. Þetta kemur fram í skýrslu Friðriks Friðrikssonar rekstrarhagfræðings sem unnin var fyrir fjármála- og efnahagsráðuneytið og birtist í gær.

Í viðmiðunarlíkönum bæði IFS Greiningar og í skýrslu Friðriks er gert ráð fyrir að veggjald í göngin verði að meðaltali 1.220 kr. án vsk. eða um 1.500 krónur með vsk. Í skýrslunni kemur fram að þjóðhagslega hagkvæmt verður að tryggja að sem allra mest af umferðinni fari í gegnum göngin.

Afar mikilvægt sé að fara í vandaða greiningu á því hvert veggjaldið megi vera til að tryggja að fólk vilji nota þau því göngin stytta vegalengdina aðeins um 15 kílómetra. Tiltölulega lítil vegstytting gerir ákvörðun um upphæð veggjalda mjög vandasama. Í skýrslu Friðriks er miðað við 40 ára endurgreiðslutíma á langtímaláni ríkisins til Vaðlaheiðarganga. Styttri lánstími sé varla raunhæfur, bendir hann á.

Í frumathugun frá 2002 kom fram að gjaldið mætti ekki vera hærra en kostnaður við að aka 15 kílómetra leið, bæði í rekstri bifreiðar og tíma bílstjóra. Ekki sé líklegt að vegfarendur sætti sig við veggjöld sem væru hlutfallslega mun hærri en í Hvalfirði þegar litið er til munar á styttingu vegalengda og þar með sparnaðar umferðarinnar.

Ef áætlanir standast verða Vaðlaheiðargöng tekin í notkun síðsumars 2018. Dragist opnunin fram yfir ágúst munu þau ekki nýtast fyrir þá miklu umferð sem er á svæðinu.