Sjónvarps- og útvarpssendar sem tryggja hér fjölbreytni eru í óvissu

Póst- og fjarskiptastofnun segir þrönga stöðu varðandi valkosti um nothæfa sendastaði fyrir hljóðvarp og sjónvarp á höfuðborgarsvæðinu standa í vegi fyrir auknu framboði á slíkri þjónustu fyrir hefðbundin dreifinet.

„Það gæti haft í för með sér verulega röskun á aðgengi að umræddri þjónustu verði ákveðið að leggja niður einhvern af þeim fáu sendastöðum sem eru nú í notkun, til dæmis vegna íbúðabyggðar,“ segir PFS um málið í minnisblaði til samgöngu- og sveitarstjórnarráðuneytisins.

Fram kemur að á höfuðborgarsvæðinu séu sendar út í lofti 23 útvarpsdagskrár á FM-tíðnisviðinu og um 20 sjónvarpsdagskrár á UHF-tíðnisviðinu. Helstu sendastaðir fyrir hljóðvarp séu nú á Vatnsendahvarfi og á Úlfarsfelli og að á Vatnsendahvarfi séu einnig sjónvarpssendar. Á báðum stöðum sé nokkur fjöldi kraftmikilla senda með góðri útbreiðslu á mestöllu höfuðborgarsvæðinu. Hins vegar sé óvissa um framtíð sendastaðanna tveggja.

„Íbúðabyggð hefur með árunum færst nær og samkvæmt nýlegum fréttum hefur Kópavogsbær í hyggju að fjölga íbúðarhúsalóðum á svæðinu,“ segir um stöðuna í Vatnsendahvarfi. „Ekki hefur komið skýrt fram hvaða afleiðingar það mun hafa varðandi sendaaðstöðuna á hæðinni, en sennilegt er að æskilegt verði talið að sendarnir víki. Á Úlfarsfelli er Vodafone með sendaaðstöðu en hún er á bráðabirgðaheimild og ekki hefur fengist varanleg heimild frá Reykjavíkurborg sem tryggir aðstöðu á fjallinu til frambúðar.“

PFS bendir á að ef útsendingakerfi verði byggt upp með smærri sendum á lægri stöðum inni í byggð verði meira um skuggasvæði og að þurft geti að nota fleiri en eina senditíðni á hverja dagskrá.

„Slíkt leiðir til óskilvirkrar nýtingar á tíðnirófinu og dregur úr mögulegum fjölda dagskráa á svæðinu. Þetta gæti enn fremur haft í för með sér að beita verði flóknari og dýrari aðferðum við útsendingar sem smærri útvarpsstöðvar ráða hugsanlega ekki við. Þannig gæti skortur á góðum sendastöðum á endanum dregið úr fjölbreytni á hljóðvarpsmarkaðnum og öryggi útsendinga,“ er varað við í minnisblaðinu.

Þá er bent á að flutningur sjónvarpssenda gæti haft í för með sér rask fyrir tugi þúsunda heimila þar sem UHF-móttökuloftnet eru stefnuvirk og í mörgum tilfellum þarf að breyta stefnu þeirra komi til flutnings. Lausn til frambúðar er sögð geta verið flókin og þurfa aðkomu margra. Heppilegir sendastaðir geti fallið undir skipulagsvald fleiri en eins sveitarfélags. „Mismunandi leiðir geta komið til skoðunar, til dæmis að staðsetja senda á fjallstoppum og/eða byggja stór fjarskiptamöstur,“ segir PFS sem kveður nauðsynlegt að þeir, sem málið varðar, jafnt fyrirtæki sem stjórnvöld, skoði málið „heildstætt og freisti þess að ná saman um skipulagningu sendistaða á höfuðborgarsvæðinu sem gætu tryggt almenningi fjölbreyttar og öruggar hljóðvarps- og sjónvarpsútsendingar á svæðinu.“