Fyrsta barnahornið vék fyrir spjaldtölvum

„Börn eru hætt að kubba,“ segir Ragnar Guðmundsson, matreiðslumeistari og einn eigenda Lauga-áss, um ákvörðun sína um að fjarlægja barnahorn veitingastaðarins í byrjun sumars. Þá voru liðin 38 ár síðan Ragnar kom upp sérstakri leikaðstöðu fyrir sína yngstu gesti með kubbum og bókum.   

„Ég hafði þá unnið á fleiri veitingastöðum og við vorum fyrst til að gera barnahorn og fengum kubba, bækur og blöð. Á þessum tíma var lítið um að fjölskyldur færu út að borða og við vorum með ódýran mat fyrir þær. Við vorum búin að vera með barnahorn í tvö ár þegar bankarnir loksins uppgötvuðu þau,“ segir Ragnar og hlær.

„En svo voru krakkarnir alveg hættir að fara í hornið enda allir komnir með iPad, tölvur og síma. Tækin eru notuð við borðin þar sem foreldrarnir eru. Ég er því búinn að setja borð og stóla í staðinn fyrir barnahornið,“ segir Ragnar.

Lauga-ás var opnaður sumarið 1979 við Laugarásveg 1 í Laugardalnum í Reykjavík. Staðurinn hefur allar götur síðan sérhæft sig í þjóðlegum íslenskum réttum. Sú nýbreytni að staðurinn bauð börnum að dunda sér með kubba og lesa bækur vakti athygli á sínum tíma og fjallað var um framtakið í fjölmiðlum. Í umfjöllun Vikunnar árið 1980 var það sagt sérstaklega lofsvert og bent á að aðrir veitingastaðir hefðu gert slíkt hið sama. 

„Nú sér maður meira að segja litla krakka í barnastólum og það er sett fyrir framan þá lítil tölva,“ segir Ragnar og tekur fram að börn séu áfram velkomin á staðinn. 

„Maður er nú kominn á efri árin og kann varla á þessi tæki sjálfur,“ segir Ragnar sem rekur Lauga-ás ásamt syni sínum, Guðmundi Kr. Ragnarssyni.