Of feitir fá silíkonteygju til að þrengja magann

Um 200 magabandsaðgerðir eru gerðar á einkastofu hér á landi ár hvert. Skurðlæknirinn að baki stofunni segir að þörf sé á samstilltu átaki í tengslum við offitu hér á landi.

Auðun Sigurðsson hefur gert magabandsaðgerðir hér á landi í rúm tvö ár. Áður gerði hann slíkar aðgerðir á sjúkrahúsi í Bretlandi. Aðgerðin felst í því að silíkonteygju er komið fyrir utan um magahálsinn til að þrengja að maganum og slá á svengdartilfinningu.

„Þegar ég kom heim var mjög mikið að gera enda hafði ekki verið boðið upp á aðgerðir sem þessar hér á landi nema í smáum stíl,“ segir Auðun. „Síðan þá hefur dregið örlítið úr ásókn í aðgerðirnar samhliða því að það dró úr uppsöfnuðu eftirspurninni.“

Þegar Auðun fór af stað með stofuna gerði hann ráð fyrir því að nokkur hluti viðskiptavina hans væri fólk sem kæmi hingað frá útlöndum. Minna hefur verið um slíkt en áætlað var sökum sterkrar stöðu krónunnar. Eitthvað sé þó um að Íslendingar búsettir erlendis, sem hafa heyrt af meðferðinni frá fólki hér heima, komi hingað í aðgerðina.

Þeir sem velja að fara í aðgerðina þurfa að greiða hana alfarið úr eigin vasa þar sem tryggingafélög eða sjúkratryggingar taka ekki þátt í kostnaðinum. Það hafi ekki komið í veg fyrir að fólk úr hinum ýmsu stéttum hafi lagst undir hnífinn. Auðun segir að hann muni ekki taka þátt í neinni pólitík í tengslum við kostnaðarþátttökuna. Hann sinni þeim sjúklingum sem til hans leita og reyni að gera það vel.

„Ég myndi hins vegar gjarnan vilja að við tækjum okkur myndarlega á því við getum gert ýmislegt í málefnum varðandi offitu og sjúkdóma henni tengda,“ segir Auðun. Bendir hann í því sambandi á samstillt átak allra aðila varðandi reykingar hér á árum áður. Unnið hafi verið að því markvisst að bæta málin og á endanum hafi kúltúrinn breyst.

„Þjóðin er alltaf að þyngjast og því fylgja ýmsir sjúkdómar,“ segir Auðun og nefnir meðal annars sykursýki í því sambandi. „Við þurfum að gera eitthvað svipað og með reykingarnar og hjálpa fólki að lenda ekki í þessum vandræðum. Ég sný mér þá að einhverju öðru ef það verður ekkert að gera í magabandsaðgerðunum.“