GusGus frumsýnir myndband við fyrsta lagið af nýju plötunni

Hljómsveitin GusGus, sem skipuð er þeim Bigga Veiru og Daníel Ágúst, sendir í dag frá sér myndband við lag af nýrri plötu sem kemur út í haust. Lagið fer í almenna spilun á morgun en það heitir Featherlight og er fyrsta lagið af plötunni sem heitir Lies Are More Flexible.

„Við vorum að klára plötuna og er hún því tilbúin. Við erum búnir að bíða lengi eftir henni og aðdáendur okkar líka svo við ákváðum að taka upphafslagið af plötunni og gefa það strax út. Það er GusGus-legt en samt svolítið sérstakt,“ segir Biggi í samtali við Vísi.

Gjörningaklúbburinn gerði myndbandið við lagið.

„Þetta er vinafólk okkar og frábærir listamenn. Okkur langaði að fá dálítið öðruvísi vinkil á þetta og fá gjörningalistafólk til að taka snúning og sjá hvað kæmi út úr því. Við fengum þau því til að gera vídjóið og það eru allir í skýjunum með það,“ segir Biggi. 

Myndbandið má sjá í spilaranum hér að neðan.