Hafa „meikað það“ á heimsvísu

Kristín Ólafsdóttir er framleiðandi og leikstjóri heimildarmyndarinnar Innsæi sem er fyrsta íslenska myndin sem fer á Netflix á heimsvísu. Kristín, sem leikstýrði myndinni með Hrund Gunnsteinsdóttur, er himinlifandi með árangurinn.

InnSæi verður tekin til sýninga á Netflix worldwide – eða á heimsvísu – þann 15. júlí næstkomandi. Það þýðir að myndin verður aðgengileg öllum áskrifendum Netflix-veitunnar í þeim 190 löndum þar sem hún er leyfð.

„Það er gríðarlega mikilvægt fyrir myndina að fá þessa dreifingu um allan heim. Vandamálið við heimildarmyndir er oft að það er erfitt að nálgast þær á fljótlegan og þægilegan hátt fyrir áhorfendur. Netflix er með öflugan flokk heimildarmynda þannig að þeir sem hafa áhuga á myndum þar sem kafað er djúpt ofan í viðfangsefnið hafa úr nógu að velja. Að Innsæi verði ein af þeim myndum er mikill heiður fyrir okkur,“ segir Kristín hjá Klikk Productions um myndina Innsæi sem fjallar m.a. um álag og stress sem fylgir auknu upplýsingaflæði og hraðanum sem einkennir nútíma samfélag.



Í myndinni er til dæmis fylgst með skólabörnum í Bretlandi sem er kennt, með hjálp taugalíffræði og núvitundar, að takast á við mikið upplýsingaflæði, streitu og auknar kröfur sem gerðar eru til þeirra. Í myndinni koma einnig fram heimsþekktir leiðtogar og hugsuðir á sviði lista, vísinda og fræða sem leiða okkur inn í margræðan heim Innsæis.

„Við vorum frökk að gefa heimildarmynd íslenskt heiti sem enginn erlendis skilur og margir héldu að við myndum ekki geta selt hana á erlenda markaði. En hugtakið Innsæi virðist bara hafa vakið upp forvitni erlendis og virðist ekki spilla fyrir myndinni heldur þvert á móti veitir henni meðbyr. Innsæi er líka orð sem við viljum hefja upp því það er mjög fallegt og hefur margræða og djúpa merkingu eins og kemur fram í myndinni.“

Spurð út í hvort þessu stóra tækifæri fylgi ekki mikil vinna og ákveðið stress segir Kristín: „Í raun ekki, þetta er bara mikil viðurkenning og það eru greinilega margir um allan heim sem tengja við efnið. Netflix sér líka um alla framkvæmd sbr. að þýða á öll tungumálin og auglýsa myndina á veitunni sinni á hverju svæði fyrir sig,“ útskýrir Kristín sem er afar spennt.

Athugasemdir og „likes“ hrúgast inn

Kristín áætlar að yfir 50.000 manns hafi núna séð Innsæi og þá er ótalið áhorf á Netflix sem veitan gefur ekki upp. Það gætu verið nokkrir tugir þúsunda í viðbót.

„Rétt er að taka fram að langflestir eru erlendir áhorfendur. Viðbrögðin hafa verið mjög nærandi fyrir okkur öll sem unnum að myndinni. Fólk virðist bregðast sterkt við boðskap myndarinnar og eftir að hún var frumsýnd í Norður- og Suður-Ameríku vorum við að fá 350-400 athugasemdir og „likes“ á Facebook-síðuna okkar daglega. Síðan hafa fjölmargir áhorfendur sent okkur tölvupóst með áhugaverðum sögum þeirra og löngun til að kynna efni myndarinnar í sínu landi eða í sinni borg. Og við Hrund höfum ferðast um Evrópu og Ameríku með fyrirlestra um myndina. Háskólasamfélögin í Bandaríkjunum hafa líka sýnt myndinni mikinn áhuga.“

Spurð út í hvaða tilgang og tækifæri þær sjái í Innsæi segir Kristín: „Við viljum breiða út boðskap Innsæis um allan heim. Fá áhorfendur til að tengjast aftur við sitt innsæi í nútímasamfélagi þar sem hraði og stress ræður oft ríkjum. Við viljum minna fólk á að gefa innsæi sínu séns og leyfa því að vera með í stórum ákvörðunartökum í lífi okkar og starfi. Ekki einungis treysta bara á rökhugsun okkar.“

„Við þurfum bæði innsæi og rökhugsun til að funkera rétt, þetta er eins og tveir ryþmar sem geta ekki verið án hvor annars. Við erum búin að einblína á rökhugsunina of lengi núna en við erum öll með hafsjó af visku innra með okkur. Nýtum hana og njótum hennar. Þá fyrst fær sköpunargleði okkar að njóta sín.“

En Netflix er ekki eina efnisveitan sem Klikk Productions hefur gert samning við í tengslum við Innsæi. Nú þegar er hægt að leigja og kaupa Innsæi á efnisveitunni Vimeo on demand um allan heim nema í Bandaríkjunum og Kanada eins og sakir standa. Svo er einnig hægt að leigja og kaupa myndina á streymisveitusvæði Amazon í þremur löndum; Bretlandi, Japan og Þýskalandi. Það er því ljóst að Innsæi er komin víða og þá er óhætt að segja að þær Kristín og Hrund hafa „meikað það“ með myndinni.