Hraðakstur nær aldrei verið eins mikill

Hraðakstur hefur aukist mikið hér á landi, samkvæmt nýrri könnun sem gerð var fyrir Samgöngustofu í lok síðasta árs. Einungis einu sinni áður hefur hraðakstur mælst meiri frá upphafi sambærilegra kannana.

Samgöngustofa lýsir yfir þungum áhyggjum vegna niðurstaðnanna, en þessar kannanir hafa verið gerðar árlega frá árinu 2005.

Í niðurstöðunum kemur fram að ökuhraði hafi aukist mikið á svæðum þar sem leyfður hámarkshraði er 90 kílómetrar á klukkustund. Meðalhraði þeirra sem tók þátt í könnuninni var 95,9 km sem gerir hann að mesta hraða frá upphafi kannana.

„54% sögðust árið 2014 aka hraðar en 90 km/klst en í fyrra var hlutfallið komið í 62%. Árið 2014 sögðust 3% aka á 101 km/klst eða hraðar en í fyrra var það hlutfall komið upp í 7% sem er það hæsta sem mælst hefur. Þetta er að lágmarki 11 km hraði umfram leyfðan hámarkshraða. Hlutfall þeirra sem fara að lögum og halda sig við 90 km/klst eða minna fer úr 46% árið 2014 niður í 37% í fyrra,“ segir í tilkynningu frá Samgöngustofu.

Jafnmiklar líkur á að kona og karl valdi slysi en afleiðingarnar oft alvarlegri hjá körlum

Þá segir að 77 prósent þeirra ökumanna sem hafa minnstu reynsluna, á aldursbilinu 18 til 24 ára, aka hraðar en 90 km þar sem það er leyfður hámarkshraði. Ábyrgð ökumanna og virðing fyrir leyfðum hámarkshraða aukist hins vegar með aldrinum.

Konur virðast jafnframt frekar aka á löglegum hraða en karlar því 52 prósent kvenna segjast halda sig innan 90 km hraðamarka á meðan 43 prósent karla gera það. Þá eru jafnmiklar líkur á að kona valdi slysi eða óhappi í umferðinni eða karl, samkvæmt slysaskýrslum. „Þegar hinsvegar afleiðingar slysanna eru skoðaðar kemur í ljós að í tilfelli karlmanna eru mun meiri líkur á að afleiðingarnar verði alvarlegar – banaslys eða alvarlegt slys.“