Upphitun fyrir leiki dagsins í enska │ Myndband

Jólafríið er búið hjá leikmönnum ensku úrvalsdeildarinnar, en tuttugasta umferðin rúllar af stað með átta leikjum í dag.

Í hádeginu mætast Tottenham og Southampton á Wembley. Þrenna Harry Kane á móti Burnley lyfti þeim hvítklæddu upp í fimmta sæti deildarinnar, einu stigi á eftir Liverpool í fjórða sætinu. Southampton er um miðja deild, í 13. sæti.

Sex leikir hefjast klukkan þrjú. Bournemouth, sem steinlá fyrir Manchester City á Þorláksmessu, fær David Moyes og lærisveina hans í West Ham í heimsókn í fallslag.

Englandsmeistarar Chelsea fá nýliða Brighton í heimsókn, Stoke fer norður til Huddersfield og Watford tekur á móti Leicester.

Jóhann Berg Guðmundsson fer með sínum liðsfélögum til Old Trafford og mætir Manchester United. United er enn í öðru sæti deildarinnar, en missti City 13 stigum á undan sér með jafnteflinu í síðustu umferð. Burnley datt niður í sjöunda sætið með ósigrinum gegn Tottenham.

Alan Pardew hefur aðeins verið mánuð í starfi hjá West Brom en er nú þegar á hálum ís, enda liðið ennþá í fallsæti og aðeins stigi frá botninum. Gylfi Þór Sigurðsson og félagar í Everton mæta á The Hawthorns í dag og vonast til að sýna meiri sköpunargleði heldur en í markalausa jafnteflinu við Chelsea.

Lokaleikur dagsins er svo viðureign Liverpool og botnliðs Swansea. Jurgen Klopp situr með sína menn í fjórða sæti deildarinnar, fjórum stigum á eftir Chelsea.

Upphitunarmyndband fyrir leiki dagsins má sjá í spilaranum hér að ofan.

Leikir dagsins:

12:30 Tottenham - Southampton, í beinni útsendingu á Stöð 2 Sport

15:00 Bournemotuh - West Ham

15:00 Chelsea - Brigthon

15:00 Huddersfield - Stoke

15:00 Manchester United - Burnley, í beinni útsendingu á Stöð 2 Sport

15:00 Watford - Leicester

15:00 West Bromwich Albion - Everton

17:30 Liverpool - Swansea, í beinni útsendingu á Stöð 2 Sport

19:30 Messan