Skortur á sjómönnum víða um land

Skortur er á sjómönnum víða um land en margir þeirra hafa undanfarna mánuði ráðið sig í vinnu í landi. Lækkun fiskverðs, og þar með launa sjómanna, er helsta ástæða þessa. Hólmgeir Jónsson, framkvæmdastjóri Sjómannasambands Íslands, segir launin hafa lækkað um þrjátíu prósent á einu ári.

„Þetta hefur náttúrlega langan aðdraganda. Gengið var sterkt á tímabili og fiskverð hefur verið að lækka. Það auðvitað skapar óánægju og síðan fer það bara að gerast að ef mönnum býðst eithvað betra í landi þá fara menn í land,“ segir Hólmgeir.

Allur gangur sé á því hvaða störf sjómenn leggi fyrir sig. 

„Það er allra handa. Svolítið um iðnaðarmenn og bara ýmis störf sem menn fá betur borgað fyrir miðað við þá vinnu sem þeir þurfa að leggja á sig. Það eru sveiflur í þessu. Bara fyrir hrun, þegar gengið var sem sterkast, þá bar líka á manneklu á sjónum. Það er bara sama að gerast núna,“ segir Hólmgeir. 

Stutt er síðan íslenskir sjómenn fóru í verkfall og skrifuðu undir nýja kjarasamninga. Hólmgeir segir almennt ríkja ánægju um nýju samningana og að þeir hafi ekki teljandi áhrif á brottfall úr greininni. Lækkum fiskverðs hafi aftur á móti haft haft þau áhrif að laun sjómanna hafi lækkað um þrjátíu prósent á einu ári og margir vilji ekki una við það.

„Skipin ná að róa ennþá og kvótaárið er náttúrlega að verða búið. En ef að þetta lagast ekki með haustinu þá getur þetta auðvitað orðið alvarlegt,“ segir hann.

Hafið þið áhyggjur af stöðunni? 

„Við höfum náttúrlega alltaf áhyggjur ef það er ekki hægt að manna flotann.“