Leitar að bíræfnum þjóf sem stal bíl af áttræðum manni

Maður sem er íbúi á hjúkrunarheimilinu Sóltúni í Reykjavík varð fyrir barðinu á bíræfnum þjóf þegar hann sótti húsfund í sal hjúkrunarheimilisins á fimmtudaginn síðastliðinn. Þjófurinn hnuplaði þá jakka af manninum sem hafði að geyma bíllykla hans og ók síðan á brott á bíl hans sem lagður var í bílastæði fyrir utan.

Einar Ágúst Baldvinsson, barnabarn unnustu mannsins, ritaði í gær færslu á Facebook síðu sinni þar sem hann óskar eftir aðstoð við að finna hinn stolna bíl sem er af gerðinni Toyota Prius.

„Kæri óþokki, vonandi líður þér vel með sjálfan þig að hafa stolið bíl af 80 ára gömlum manni,” ritar Einar í lok færslu sinnar.

Í samtali við Vísi segir Einar að engir sjónarvottar hafi verið að stuldinum en samkvæmt upptökum úr myndavélakerfi hjúkrunarheimilisins sjáist maður grípa umræddan jakka sem hengdur var upp í fatahengi fyrir utan sal hjúkrunarheimilisins. Hann hafi svo farið inn á salerni og komið út skömmu síðar með bakpoka sem hann hafði komið jakkanum fyrir í. Þar næst hafi hann svo sest upp í bíl og ekið burt.

Hann segir að bílleysið sé mjög erfitt bæði fyrir manninn og ömmu hans enda eina farartækið sem þau hafa til umráða. Amma hans sé afar slæm í baki og far þannig hvergi labbandi. Vill hann því biðla til allra að hafa augun opin eftir bílnum.

„Bíllinn er: ljós-platínugrár Toyota Prius með bílnúmerinu JN-H85, vel með farinn, 2012 árgerð sem ekinn er um 27.000 km. Þetta var milli kl. 17-18 þann 16. nóv. 2017. Ef þú gætir hafa rekist á viðkomandi óþokka, hefur mögulega séð bílinn á ferð eða ert með myndavél í bílnum þínum sem gæti hafa tekið upp myndskeið af ferðum bifreiðarinnar þá mátt þú vinsamlegast fara strax til lögreglunnar með upplýsingarnar.“

Þeir sem hafa nánari upplýsingar um málið eru beðnir um að hafa samband við lögreglu í síma 444-1000.