Kökurnar seldust upp á fyrstu þremur korterunum

Þrátt fyrir rigningu og rok var fullur salur af fólki á jólabasar Hringsins rétt eftir opnun í dag. Kökurnar eru ávalt vinsælastar og voru uppseldar á fyrstu þremur korterunum.

Kökurnar og gersemarnar hverfa úr hillunum á örskotstundu enda veit fólk að hverju það gengur þegar það mætir á basarinn en hann hefur verið árlega frá árinu 1942.

Þetta minnir mig alltaf á þegar við opnum hurðina hérna og stór röð er fyrir utan, þegar það er verið að reka féð af fjalli. Þá kemur straumurinn niður og svona koma skjólstæðingar okkar inn að kaupa, segir Sonja Egilsdóttir, formaður Hringsins um vinsældir jólabasarins.  

Hringskonur vinna allt árið um kring að undirbúa og halda fjáraflanir og það sem af er ári hafa Hringskonur veitt styrki upp á rúmar 97 milljónir króna. Jólabasarinn hefur alla tíð verið vinsæll viðburður og jafnvel þótt veðurguðirnir voru ekki hliðhollir í dag var margt um manninn.

Við erum að vona núna að þeir breyti aðeins veðurspánni og geri ekki alveg bandbrjálað veður, segir Guðrún Kr. Jörgensen Hringskona og hlær. Þær hringskonur segja kökurnar vera vinsæastar og benda þá sérstaklega á maregnsterturnar  

Dofri Örn Guðlaugsson keypti köku fyrir barnsmóður sína, en þau eru nýbakaðir foreldrar og dvaldi dóttir þeirra á vökudeildinni í 105 daga og tók hann sérstaklega eftir því hversu margir munir á deildinni voru merktir Hringskonum.