Ölvaður maður handtekinn í brúðkaupi eftir að hafa brotið vask

Lögreglan á höfuðborgarsvæðinu handtók á þriðja tímanum í nótt ölvaðan mann í brúðkaupsveislu þar sem hann hafði „verið til leiðinda“ og brotið vask á staðnum.

Í dagbók lögreglu segir að maðurinn hafi verið vistaður í fangaklefa.

Skömmu fyrir klukkan tvö í nótt var lögreglu tilkynnt um mann sem hafði fallið fimm metra við Marteinslaug í Grafarholtshverfi. Hann var fluttur á slysadeild til aðhlynningar, en hann var með áverka á höfði. Málið er í rannsókn.

Upp úr klukkan þrjú var lögreglu tilkynnt um slagsmál í miðbænum, þar sem einn maður var skallaður. Hann leitaði aðhlynningar á slysadeild en gerandinn var handtekinn og vistaður í fangaklefa.

Þá hafði lögregla einnig afskipti af nokkrum ökumönnum sem grunaðir eru um ölvun við akstur.