Tommi fór í sex vikna McDonald's-æfingabúðir en opnaði Hard Rock

Verslunarmiðstöðin Kringlan fagnar 30 ára afmæli í ár. Hún hefur um árabil verið einn af hornsteinum íslenskrar verslunar en þó mátti ekki miklu muna að hún yrði umtalsvert minni en við þekkjum í dag.

Þetta segir Tómas Andrés Tómasson, betur þekktur sem Hamborgarbúllu-Tómas, en rætt var við hann í Reykjavík síðdegis í tilefni stórafmælis Kringlunnar. Tommi var meðal þeirra fyrstu sem ákváðu að vera með í verslunarmiðstöðvarævintýrinu en einn forsprakka verkefnisins, Sigurður Gísli Pálmason sem nú er kenndur við Hagkaup, sannfærði Tomma um að opna útibú fyrir McDonald's-hamborgarakeðjuna í húsinu.

Tommi segir að í upphafi hafi gengið erfiðlega að sannfæra kaupmenn um að kaupa sér verslunarpláss í Kringlunni. Lítil trú hafi verið á því að slík miðstöð gæti gengið á hinum litla íslenska markaði. Kaupmenn sem höfðu látið slag standa voru dregnir á fund þar sem þeim var tjáð að svo gæti farið að húsnæðið yrði minnkað um þriðjung, jafnvel meira, í ljósi þess hversu erfiðlega gekk að selja pláss í Kringlunni.

Sannfærðust í Lundúnarferðum

Tommi sá að eitthvað þyrfti að gera í málinu og hvatti hann því forráðamenn hússins til að fara með hóp af kaupmönnum til Lundúna að skoða verslunarmiðstöðvar. „Ég tók þátt í að fara út með tvo hópa af kaupmönnum og þá allt í einu opnuðust augu þeirra. Þeir sáu að þetta ætti framtíðina fyrir sér,“ segir Tommi.

Aldrei varð þó neitt úr því að Tommi sæi um rekstur McDonald's í Kringlunni - þrátt fyrir að hafa verið sendur í sex vikna McDonald's-æfingabúðir í LA af forsvarsmönnum keðjunnar. Einhvers staðar á leiðinni hitti ég Hard Rock-menn og þá fór ég að vega og meta hvort ég ætti að gera Hard Rock eða McDonald's,“ segir Tommi. Hard Rock hafi orðið ofan á.

Hann hefur þó hætt öllum afskiptum af Hard Rock sem nú rekur einn veitingastað í Lækjargötu. Þess í stað hefur hann einbeitt sér að Hamborgarabúllu Tómasar sem nú má finna í 6 löndum víða í Evrópu; svo sem í Berlín, Lundúnum, Kaupmannahöfn og Osló, í Róm, Malmö og í Árósum.

Spjall þeirra Reykjavíkur sídegis-manna við Tomma má heyra hér að neðan.