NFL: Aðhlátursefni deildarinnar vann loksins leik eftir ársbið

Fjöldi óvæntra úrslita litu dagsins ljós í NFL-deildinni í gærkvöld en þar ber hæst að nefna fyrsta sigur Cleveland Browns í rúmlega ár.

Browns hafa verið aðhlátursefni deildarinnar undanfarin ár en liðið náði að kreista fram sigur gegn San Diego Chargers á heimavelli í gær.

Var þetta fyrsti sigur liðsins í rúmlega ár eða allt frá sigri á San Fransisco 49ers þann 13. desember 2015.

Með því náði Browns að koma í veg fyrir að vera aðeins annað liðið í sögunni sem tapar öllum leikjum tímabilsins á eftir Detroit Lions-liðinu 2008.

Atlanta Falcons lyfti sér upp í 2. sæti NFC-deildarinnar og tryggði sæti sitt í úrslitakeppninni með öruggum sigri á Carolina Panthers.

Carolina sem lék í Ofurskálinni í febrúar síðastliðnum féllu endanlega úr leik í baráttunni um sæti í úrslitakeppninni í ár.

Sigur Oakland Raiders gegn Indianapolis Colts þýðir að Colts eigi ekki lengur möguleika á sæti í úrslitakeppninni.

Lykilleikmenn meiddust

Þrátt fyrir sigurinn varð Oakland fyrir áfalli þegar leikstjórnandi liðsins, Derek Carr, fór meiddur af velli en hann verður ekki meira með á tímabilinu.

Hann var ekki eini lykilleikmaðurinn sem fór meiddur af velli í gær en Marcus Mariota, leikstjórnandi Tennessee Titans, fór einnig meiddur af velli.

Þá unnu San Fransisco 49ers og Jacksonville Jaguars sjaldséða sigra á Los Angeles Rams og Tennessee Titans en 49ers, Jaguars og Browns hafa verið lélegustu lið deildarinnar.

Sextánda umferð NFL-deildarinnar heldur áfram í kvöld með leikjum Pittsburgh Steelers og Baltimore Ravens og Kansas City Chiefs og Denver Broncos en Stöð 2 Sport sýnir leik Pittsburg og Baltimore í kvöld.

Úrslit gærkvöldsins:

Buffalo Bills 31-34 Miami Dolphins

Carolina Panthers 16-33 Atlanta Falcons

Washington Redskins 41-21 Chicago Bears

Cleveland Browns 20-17 San Diego Chargers

Green Bay Packers 38-25 Minnesota Vikings

Jacksonville Jaguars 38-17 Tennessee Titans

New England Patriots 41-3 New York Jets

Oakland Raiders 33-25 Indianapolis Colts

Los Angeles Rams 21-22 San Fransisco 49ers

New Orelans Saints 31-24 Tampa Bay Buccaneers

Seattle Seahawks 31-34 Arizona Cardinals

Houston Texans 12-10 Cincinatti Bengals