A-landsliðið aldrei spilað fleiri leiki

Íslenska A-landsliðið í knattspyrnu er þegar búið að setja met yfir leikjafjölda á einu ári.

Tveir landsleikir eru eftir af árinu og þegar upp verður staðið verða leikirnir í ár orðnir 17 hjá liðinu.

Metið var 13 leikir og sett árið 1988. Leikirnir á EM eru auðvitað stór hluti af þessu og svo voru æfingaleikirnir fleiri en venjulega.

„Þetta hefur tekið á alla og margir hafa fórnað miklu fyrir liðið á þessum tíma. Það er mér bæði ljúft og skylt að þakka og hrósa öllum fyrir sína vinnu,“ sagði Heimir Hallgrímsson landsliðsþjálfari.

„Það hefði verið auðvelt að detta í einhverja neikvæðni út af þreytu en það hefur aldrei gerst hjá neinum. Það segir mikið um samheldnina og væntumþykjuna sem allir hafa fyrir liðinu.“