Félagslegar íbúðir dreifist víðar

„Við megum ekki gleyma því að Breiðholtið er stórt hverfi og það er mjög mikil fjölbreytni hérna, við megum ekki bara tala hverfið okkar niður. Það er mikill félagsauður hérna.“ Þetta segir Elísabet Karlsdóttir, verkefnisstjóri félagsmiðstöðva í Breiðholti.

„Það þýðir ekki að tala alltaf um að það sé svona mikill vandi í kringum þetta,“ heldur Elísabet áfram. „Við þurfum að tala það upp hvað eru mikil tækifæri hérna.“

Efra-Breiðholt hefur verið mikið til umræðu á síðustu dögum eftir að sagt var að það skæri sig úr öðrum hverfum í skýrslu Rauða krossins um hagi lakast settu íbúa Reykjavíkurborgar.

Elísabet segir skýrsluna alls ekki hafa komið þeim sem vinna í félagsþjónustu í Breiðholti á óvart.

„Við erum mjög meðvituð um það að við erum bæði með mikið af lágtekjufólki, einstæðum foreldrum og hælisleitendum. Við erum með mikla fjölmenningu hérna. Þetta er fyrsta og fremst út af félagsbústöðum, vegna þess að húsnæði hér hefur verið á lægra verði,“ segir hún.

Að sögn Elísabetar eru starfsmenn félagsþjónustunnar í Breiðholti alltaf að hugsa um hvernig hægt sé að bæta þjónustuna til að mæta þörfum þessa hóps.

Þuríður Sigurðardóttir sér um sérstakt fjölskylduverkefni, Tinnu, sem er úrræði fyrir unga einstæða foreldra sem hafa fengið fjárhagsaðstoð til framfærslu til lengri tíma í Breiðholti. Hún segir hugsunina við verkefnið að rjúfa félagslegan arf.

„Þetta eru kannski annarrar kynslóðar fjárhagsaðstoðarþegar. Stundum eru foreldrarnir að þiggja fjárhagsaðstoð en það þarf líka að huga að börnunum, þau eru ekki að nýta frístundakortin og eru ekki að aðlagast í samfélaginu nema þeim hópum sem þau tilheyra, hópi fátækra fjölskyldna.“

Þuríður segir lykilatriði að rjúfa vítahringinn með því að ná til barnanna. Einnig sé mikilvægt að efla menntunarstigið í Breiðholti, en styrkur hefur verið veittur til íslenskukennslu síðustu árin.

Þuríður og Elísabet eru sammála um að gott samstarf ríki á mörgum vígstöðvum til að bæta ástandið í Breiðholti, meira að segja séu fyrirtæki sem vilji leggja sitt af mörkum. Þörf sé þó á auknu fjármagni.

Þuríður segir einnig að ekki hafi tekist að vinda ofan af félagslegu leiguhúsnæði sem var byggt í Fellunum á sínum tíma.

„Stefna ætti að ríkja um að dreifa félagslegum íbúðum um alla Reykjavík en ekki bara í Efra-Breiðholti.“ 

Fullkomin fásinna

Lögreglumaðurinn Birgir Örn Guðjónsson segir í bloggfærslu, eftir að Fréttablaðið greindi frá umkvörtunum úr Fellahverfi um að lögregla sinnti hverfinu ekki vel, að lögreglumenn í Efra-Breiðholti sinni því svæði betur en nokkru öðru hverfi á hans svæði.

„Góðu fréttirnar eru þær að við erum alls ekki að hunsa þetta hverfi, síður en svo. Sorglegi sannleikurinn er samt sá að það eru yfirleitt einungis tveir lögreglubílar sem sjá um eftirlit og útköll á þessu svæði, sem er bæði Kópavogur og Breiðholt,“ skrifar Birgir, einnig þekktur sem Biggi lögga.

„Málið er að það kostar víst pening að halda úti löggæslu og sá peningur hefur því miður verið af skornum skammti. Þessi umræða er nefnilega nátengd umræðu síðustu vikna um stöðu lögreglunnar á Íslandi,“ segir Birgir. „Það er alls staðar skorið við nögl. Þetta er það sem við höfum verið að benda á. Þetta hefur bara verið áherslan hjá ráðamönnunum. Eða réttara sagt, þetta hefur ekki verið áherslan.“

Þá víkur Birgir að því sem haft var eftir erlendum verslunareiganda í Fellahverfi að lögregla bregðist fyrr við ef Íslendingur biður um aðstoð en ef útlendingur hringir. „Það er að sjálfsögðu algjör og fullkomin fásinna.“

Fréttin birtist fyrst í Fréttablaðinu