Ómögulegt er að segja til um hversu mörg tjón verða á hverju ári vegna símanotkunar ökumanna. Langflestir ökumenn neita því nefnilega staðfastlega að hafa verið með símann uppi ef slys ber að höndum.

Lögreglan, tryggingafélög og Samgöngustofa geta ekki sett nákvæma tölu á slys sem tengjast símanotkun því margir neiti því að hafa verið að gera eitthvað í símanum. Þó er ljóst að mjög margir nota símann á meðan ekið er og oft er síminn orsakavaldurinn, þó það sé erfitt að sanna það.

Sigurjón Andrésson, markaðsstjóri Sjóvá, segir að fyrirtækið hafi verið að skoða málið. „Við höfum ekki beinar tjóna- eða slysatölur en sýnileg notkun hefur aukist – það er á hreinu,“ segir hann.

Samkvæmt könnun sem Gallup gerði fyrir Sjóvá komi fram að yfir 30 prósent ökumanna senda skilaboð undir stýri en yfir 90% telja það vera mjög hættulegt. Sumir halda að það séu yngstu ökumennirnir sem nota símana mest, en samkvæmt okkar könnun er það ekki endilega þannig. Þeir sem hringja og svara í síma oftast í umferðinni eru karlar á aldrinum 35-44 ára sem hafa góðar tekjur.“

Sigurjón segir að Sjóvá hafi lengi verið að vekja athygli á hættunni sem felst í því að nota símann á einn eða annan hátt undir stýri. „Við verðum að taka okkur á. Að taka ákvörðun um að nota ekki símana þegar við erum að keyra. Lang oftast erum við ekki nema nokkrar mínútur í bílnum í einu. Hvað er svo áríðandi í símanum sem réttlætir svo stórkostlega áhættu að stofna lífi og limum annarra í hættu. Hvaða rétt höfum við á því?“ spyr hann. 

Fréttin birtist fyrst í Fréttablaðinu