Innlent

Keyrðu niður að flugvélaflakinu í leyfisleysi og þurftu að borga 100 þúsund krónur

Sunna Kristín Hilmarsdóttir skrifar
Vegurinn niður að flugvélaflakinu var illa farinn þegar landeigendur lokuðu honum síðasta vetur.
Vegurinn niður að flugvélaflakinu var illa farinn þegar landeigendur lokuðu honum síðasta vetur. mynd/benedikt bragason og magnús már byron

Landeigendur á Sólheimasandi rukka ferðamenn um 100 þúsund krónur vilji þeir aka niður á sandinn en þar er flugvélaflak sem er vinsæll viðkomustaður ferðamanna. Þetta segir Benedikt Bragason bóndi á Ytri-Sólheimum I og landeigandi í samtali við Vísi en í gær rukkaði hann ferðamenn sem farið höfðu á bíl niður að flakinu um 800 evrur sem samsvarar 100 þúsund krónum. Landeigendur lokuðu veginum að flakinu fyrr á árinu.

Fyrst var greint frá málinu á Facebook-hópnum Bakland ferðaþjónustunnar en þar segir Kjartan Magnússon, sem rekur MK bílaleigu, frá viðskiptavini sínum sem fór á bíl niður á sandinn:

„Viðskiptavinur minn, sem er með bíl á leigu hjá mér, sendi mér sérstök skilaboð í kvöld. Hann fór að skoða þetta fræga flugvélaflak Ameríska hersins og lagði víst innan girðingar áður en gangan hófst. Þegar hann kom til baka var búið að læsa hliðinu að jörðinni með hengilás. Eftir nokkra leit fannst eigandinn sem sagði honum að hann fengi ekki að fara án þess að hann borgaði 800 evrur! Þetta gerði greyið og fékk að fara. Ég sagði honum að tilkynna þetta til lögreglunnar, sem er núna að rannsaka málið og fannst afar skrítið. Ég skil vissulega að landeigandinn hljóti að vera þreyttur á ágangi ferðamanna, sem ég hef heyrt að sé mikill og grófur. En fjárkúgun? Það er of langt gengið.“

Öllum frjálst að labba niður að flakinu
Kjartan vildi ekki tjá sig um málið við Vísi þegar eftir því var leitað og sagði málið komið til lögreglu. Samkvæmt upplýsingum frá lögreglunni á Suðurlandi er málið komið inn á borð þar en hefur ekkert verið skoðað. Lögreglan gat því ekki svarað spurningum um það.

Benedikt segir að ferðamennirnir sem hann hafi rukkað í gær hafi elt aðra niður á sandinn sem voru með leyfi til að aka niður eftir og höfðu greitt fyrir það.

„Ef að fólk vill fara niður eftir á bílum þá höfum við verið að rukka 100 þúsund krónur fyrir það en það er auðvitað öllum frjálst að labba niður eftir,“ segir Benedikt en landeigendurnir eru ellefu talsins og ákváðu þetta á fundi sínum í vor.

Aðspurður hvort að það sé vel merkt að ekki megi fara niður eftir á bíl segir Benedikt svo vera. Þá séu stór skilti sem gefi það til kynna að um einkaland sé að ræða. Fólkið læstist inni á landareigninni eins og greint er frá í Facebook-færslunni en þegar ferðamenn keyra niður að sandinum fara þeir á bílunum nánast alveg að flakinu að sögn Benedikts.

Báðust afsökunar og borguðu
„Ferðamennirnir sem þetta fólk elti reyndi að segja þeim að þau þyrftu leyfi til að fara á sandinn á bíl en þau skildu víst litla ensku þá. Þegar þau læstust inni þá hringdu þau eftir hjálp, ég veit ekki í hvern þau hringdu, en lögreglan hringdi í mig og lét mig vita. Ég fór því og opnaði fyrir þeim en þau töluðu mjög góða ensku við mig, sögðust alveg skilja þetta, borguðu og báðust afsökunar. Það fór ekkert illa á með okkur en ég gerði þeim grein fyrir því að ég væri bara einn af ellefu landeigendum þarna og þetta væri mitt verkefni. Þetta er auðvitað ekkert skemmtilegt en svona er þetta,“ segir Benedikt.

Í frétt um málið á vef RÚV er haft eftir Jóhanni Fannari Guðjónssyni lögfræðingi að landeigendur hafi nokkuð ríkar heimildir til að loka einkavegum fyrir umferð en heimildir til gjaldtöku fari eftir eðli þess svæðis sem um er að ræða í hvert sinn.

Benedikt segir að það gerist varla að fólk keyri niður að flakinu án þess að hafa leyfi til þess frá landeigendum. Þá segir hann ástandið á landinu hafa batnað mikið eftir að brugðið var á það ráð að loka veginum. Það er um þriggja kílómetra gangur niður á Sólheimasand svo það getur tekið fólk dágóðan tíma að labba niður að flakinu. Það virðist þó ekki hafa áhrif á það hversu margir fari niður á sandinn.

Mörg hundruð manns á sandinum á hverjum degi
„Það eru mörg hundruð manns sem eru að labba á sandinum á hverjum degi og vanalega tugir bíla sem er lagt hérna í vegkantinum á þjóðveginum,“ segir Benedikt en það er á dagskrá hjá landeigendum að fara í það að búa til bílastæði í samstarfi við Vegagerðina.

Flugvélaflakið er af gamalli Douglas-flugvél Bandaríkjahers. Vélin hefur legið í fjöruborðinu í tugi ára eða allt frá því að hún varð eldsneytislaus í birgðaflutningum á Suðurlandi. Eins og áður segir nýtur vélin mikilla vinsælda á meðal ferðamanna sem hingað koma en í myndbandi Justin Bieber við lagið I‘ll Show You, sem tekið var upp hér á landi, má meðal annars sjá söngvarann dans á þaki vélarinnar.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.