Engar afsakanir teknar gildar

„Eftir öll þessi félagaskipti er þetta núna minn hópur. Það eru sennilega engir leikmenn í hópnum sem ég vil ekki hafa. Það voru engir leikmenn keyptir sem ég vildi ekki fá og ég hef ekki selt neina leikmenn sem ég vildi ekki selja,“ sagði Jürgen Klopp, knattspyrnustjóri Liverpool, í viðtali fyrr í sumar.

Þjóðverjinn hefur sitt fyrsta heila tímabil við stjórnvölinn hjá Liverpool í dag þegar liðið sækir Arsenal heim í 1. umferð ensku úrvalsdeildarinnar.

Klopp tók við Liverpool af Brendan Rodgers í október á síðasta ári. Gengið var upp og niður. Liverpool gekk ekkert sérstaklega vel í úrvalsdeildinni og endaði í 8. sæti hennar en liðið komst hins vegar bæði í úrslit deildabikarsins og Evrópudeildarinnar.

Eigendur Liverpool voru hrifnir af því sem þeir sáu og gerðu nýjan sex ára samning við Klopp í sumar, sem er til marks um trúna á honum og aðferðum hans.

Klopp hefur nú fengið heilt undir­búningstímabil og ráðist í breytingar á leikmannahópi Liverpool. Þetta er núna „hans“ lið og Klopp segist ekki hafa neinar afsakanir fyrir því að ná ekki ­árangri.

„Ég er óhræddur við að gera breytingar, það er hluti af starfinu. Ég er ánægður með liðið núna,“ sagði Klopp. „Eins og staðan er núna ættum við ekki að leita að afsökunum og segja hluti eins og að ég þurfi ár í viðbót.“

Álagið verður minna á þessu tímabili þar sem Liverpool náði ekki Evrópusæti. Þrátt fyrir að taka við í október stýrði Klopp Liverpool í 52 leikjum á síðasta tímabili og leikjaálagið tók sinn toll.

Klopp fær því enn meiri tíma á æfingasvæðinu til að innleiða hugmyndir sínar og setja mark sitt á liðið. Liverpool spilaði nokkra frábæra leiki á síðasta tímabili þar sem liðið pressaði stíft og sótti hratt að hætti Klopps. En slakur varnarleikur var liðinu oft fjötur um fót og hann er stærsta spurningarmerkið fyrir þetta tímabil.

Nýi markvörðurinn, Loris Karius, handarbrotnaði á dögunum og missir af byrjun tímabilsins, varnar­maðurinn Mamadou Sakho var sendur heim úr æfingaferð Liverpool í Bandaríkjunum og vandamálið með stöðu vinstri bakvarðar er enn óleyst. Kamerúnski miðvörðurinn Joël Matip er þó góð viðbót við leikmannahóp Liverpool og ætti að styrkja vörnina.

Liverpool mætir sterkara til leiks en á síðasta tímabili og það eru jákvæð teikn á lofti. En það er óvíst hversu langt það fleytir liðinu. Barátta um Meistaradeildarsæti verður væntanlega hlutskipti Liverpool í vetur.

Stórleikur Arsenal og Liverpool verður í beinni útsendingu á Stöð 2 Sport 2 og Stöð 2 Sport 2 HD í dag.