Innlent

Blaðamaður The New Yorker: Andri Snær eins og ungur Woody Allen og Halla holdgervingur einlægninnar

Sunna Kristín Hilmarsdóttir skrifar
Andri Snær Magnason og Halla Tómasdóttir sem bæði voru í framboði til forseta Íslands.
Andri Snær Magnason og Halla Tómasdóttir sem bæði voru í framboði til forseta Íslands. vísir/hanna

Andri Snær Magnason rithöfundur og fyrrverandi forsetaframbjóðandi minnir Adam Gopnik, einn reyndasta blaðamann tímaritsins The New Yorker, á ungan Woody Allen. Þá segir Gopnik að Halla Tómasdóttir rekstrarhagfræðingur og fyrrverandi forsetaframbjóðandi sé einlægasta manneskja sem hann hafi séð. Hún sé eins og lifandi emoji-karl sem táknar einlægni, og þar með eins konar holdgervingur einlægninnar.

Gopnik kom hingað til lands í tengslum við forsetakosningarnar í júní og skrifar afar áhugaverða grein um ferðina sem lesa má á vefsíðu The New Yorker. Eitt af því skemmtilegasta við greinina eru mannlýsingar Gopnik enda hefur hann ef til vill nokkuð aðra sýn á frambjóðendur heldur en hinn venjulegi Íslendingur.

Hæð Guðna áhrifameiri í sjónvarpi
Þannig nefnir Gopnik að honum þykja sérstaklega athyglisvert að fræðimaður á borð við sagnfræðinginn Guðna Th. Jóhannesson, sem hafi haft það að atvinnu að afbyggja ýmsar viðteknar hugmyndir um sögu þjóðarinnar, hafi átt möguleika á sigri í forsetakosningum, og á endanum unnið.  Gopnik er tíðrætt um hversu hávaxinn Guðni er en blaðamaðurinn horfði á kappræður RÚV að kvöldi kjördags:

„Hæð Guðna er jafnvel áhrifameiri í sjónvarpi en þegar maður hittir hann í eigin persónu, þó að þetta stöðuga augnaráð sem gerir hann svo traustvekjandi virðist fast á honum núna,“ segir Gopnik í grein sinni.

Davíð Oddson eins og norskt 19. aldar ljóðskáld
Yfir kappræðunum upplifir hann líka Höllu sem þessa ofureinlægu manneskju:

„Halla var einlægasta manneskja sem ég hef séð, lifandi emoji-karl sem táknar einlægni: hún hallaði höfðinu aðeins til hliðar og andlitið fullkomin jafna af hlýju brosi og áhyggjufullum en umhyggjusömum svip. Hún útskýrði að hún væri bara dóttir pípara að bjóða sig fram til forseta. Mér leið pínu óþægilega.“

Þá segir Gopnik að í sjónvarpinu hafi Davíð Oddsson minnt sig á norskt 19. aldar leikskáld með grátt hárið greitt aftur og dapran svip.

Gopnik lýsir síðan heimsókn sinni heim til Andra Snæs sem býr í Vogahverfinu í Reykjavík og tekur fram að þetta hafi verið eini staðurinn þar sem honum var ekki boðið kaffi. Gopnik rekur spjall þeirra:

„„Forsetinn gæti verið hlutverk fyrir einhvern sem er skapandi,“ sagði Andri Snær hlæjandi. Hann er venjulega með lymskulegan, afsakaðu-mig svip á andlitinu, eins og ungur Woody Allen,““ segir Gopnik um Andra Snæ.

Grein Gopnik má lesa í heild sinni hér.


Tengdar fréttir

Nýr forseti óhræddur við óvinsælar ákvarðanir

Guðni Th. Jóhannesson er sjötti forseti lýðveldisins Íslands. Hann og kona hans hyggjast vinna náið saman á meðan embættistíð hans stendur. Fjögur börn flytja með þeim hjónum á Bessastaði eftir rúman mánuð.

Halla Tómasdóttir: Við getum ekki annað en fagnað

Elísabet Jökulsdóttir segist líða eins og regnboga eftir forsetakosningarnar á laugardag. Andri Snær Magnason ætlar að pakka jakkafötunum en Davíð Oddsson hefur engar áhyggjur af því að hafa skaðast í kosningunum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.