Vardy áfrýjar ekki en vonast til að sleppa við bann

Jamie Vardy hefur ákveðið að andmæla ekki kæru enska knattspyrnusambandsins en vonast samt sem áður að sleppa við bann.

Vardy fékk að líta rauða spjaldið er Leicester gerði 2-2 jafntefli við West Ham um helgina. Síðari áminning hans í leiknum var fyrir leikaraskap en þeim dómi mótmælti hann harðlega.

Vardy var kærður af enska sambandinu fyrir hegðun sína gagnvart dómaranum Jon Moss og mun nú hitta aganefnd í næstu viku. Nú þegar er ljóst að hann verður í banni í leik Leicster gegn Swansea um helgina fyrir rauða spjaldið sem hann fékk gegn West Ham.

Leicester er með fimm stiga forystu á toppi deildarinnar þegar fjórar umferðir eru eftir. Tottenham er í öðru sæti og hefur verið á mikilli siglingu að undanförnu.