Búið að kæra Vardy

Enska knattspyrnusambandið hefur ákveðið að kæra Jamie Vardy til aganefndar sambandsins vegna hegðunar hans eftir að honum var vísað af velli í leik Leicester gegn West Ham um helgina.

Vardy brást illa við eftir að hann fékk áminningu fyrir leikaraskap en það var annað gula spjaldið hans í leiknum. Lét hann Jon Moss, dómara leiksins, heyra það.

Leicester var þá í 1-0 forystu eftir að Vardy hafði skorað í leiknum en lenti svo 2-1 undir. West Ham fékk vítaspyrnu á 83. mínútu en Leicester var einnig kært fyrir að hafa ekki stjórn á leikmönnum sínum vegna þeirrar ákvörðunar.

Sjá einnig: Ranieri neitaði að tjá sig um dómarann

Leicester náði þó að tryggja sér dýrmætt jafntefli með marki úr vítaspyrnu í uppbótartíma en nú er líklegt að liðið verði án Vardy í næstu tveimur leikjum, að minnsta kosti. Vardy er ásamt Harry Kane markahæsti leikmaður ensku úrvalsdeildarinnar með 22 mörk.

Liðið á fjóra leiki eftir af tímabilinu og þarf átta stig úr þeim til að gulltryggja sér titilinn. Leicester á næst leik gegn Swansea, þá Manchester United, Everton og Chelsea.