Bjarni: Brást við með sanngjörnum og eðlilegum hætti

„Að þessu leytinu til tel ég að ég hafi brugðist við með sanngjörnum og eðlilegum hætti á allan hátt við erindi háttvirts þingmanns,“ sagði Bjarni Benediktsson fjármálaráðherra við fyrirspurn Kristjáns L. Möller, þingmanns Samfylkingarinnar, á Alþingi í dag.

Kristján og aðrir þingmenn Samfylkingarinnar hafa gagnrýnt Bjarna harðlega fyrir svar hans við fyrirspurn um sölu á eignarhlut Landsbankans í Borgun og Valitor. Tólf spurningar voru lagðar fram en þingmennirnir telja svörin ófullnægjandi.

„Mín spurning til hæstvirts fjármálaráðherra er einfaldlega þessi: hyggst ráðherrann ekki láta ráðuneytið vinna upp viðbótar svar sem hann mun þá leggja hér fram á Alþingi og svara þeim spurningum sem til hans hafa verið beint,“ sagði Kristján sem meðal annars vildi svar við hvernig eignarhald skiptist á milli kaupenda. Bjarni sagðist ætla að taka það til skoðunar hvort þeirri spurningu verði svarað.

„Ég heyri að háttvirtur þingmaður er spenntur fyrir því að finna út úr þessu og ég skal taka það til íhugunar hvort hægt sé að bregðast við því. En ég var eingöngu í upphafi málsins að benda á það að þessar upplýsingar eru ekki að finna í fjármálaráðuneytinu. Það eru tvær stjórnir á milli mín og upplýsinganna,“ sagði Bjarni.

Þá sagðist hann hafa brugðist við spurningum Kristjáns með sem bestum hætti. „Staða málsins er einfaldlega sú að bankaráðið hefur nú athugasemdir bankasýslunnar til umfjöllunar og hyggst bregðast við þeim og er beðið um að gera það núna innan skamms tíma. Með þessum hætti er ég að leggja mitt af mörkum til þess að fá fram í dagsljósið allt sem varðar söluna í Borgun,“ sagði Bjarni.