Norðmenn rýma hús vegna hættu á berghlaupi

Búið er rýma þrjú hús sem standa við rætur norska fjallsins Mannen í sveitarfélaginu Rauma vegna hættu á berghlaupi.

Berghlaup hefur verið yfirvofandi í fjallinu um margra ára skeið og hafa yfirvöld fylgst náið með. Viðbúnaðarstig hefur nú verið hækkað vegna mikillar gliðnunar í fjallinu síðustu sólarhringa.

Talsmaður vatns- og orkumálayfirvalda segir í samtali við Dagbladet að gliðnun hafi mælst mismikil eftir dögum í sumar, en að mikil aukning hafi orðið í dag. „Síðustu tvo tímana höfum við séð hreyfingu upp á 5,7 millimetra í efsta og virkasta hluta fjallsins, sem samsvarar næstum sjö sentimetra á dag.“

Sjá einnig: Berghlaup á Íslandi hafa valdið viðlíka flóðbylgjum og í norskri stórslysamynd

Alls búa níu manns í húsunum þremur sem búið er að rýma og segir bæjarstjórinn í Rauma að íbúar hafi tekið skipuninni með ró.

Gliðnunina í fjallinu má rekja til mikillar úrkomu síðustu daga og er búist verið frekari rigningu næstu daga.

Mannen er 1.294 metra hátt fjall í Romsdal, um miðja vegu milli Bergen og Þrándheims, og hafa vísindamenn fylgst með fjallinu vegna yfirvofandi berghlaups frá árinu 2009.