Tíu vinsælustu Íslendingarnir á Instagram

„Þeir bara sinna þessu ekki,“ segir Snorri Barón, hjá Baklandinu, en hann hefur tekið saman tíu vinsælustu Íslendingana á samfélagsmiðlinum Instagram. Fótboltamennirnir virðast ekki sinna Instagraminu nægilega vel en Gylfi Þór Sigurðsson er eini knattspyrnumaðurinn á topp tíu listanum.

Snorri var gestur í þættinum Brennslan á FM957 í morgun. Þar er Crossfit-fólkið okkar mjög áberandi en Hafþór Júlíus Björnsson trónir á toppnum. Vöðvar skipta greinilega miklu máli á Instagram. Snorri segir að knattspyrnumenn séu farnir að fatta þetta núna og séu í auknu mæli farnir að sinna Instagram-reikningi sínum. Aðrir íþróttamenn kannski treysti meira á þessa leið til að koma sér á framfæri.

„Hún er meistarinn, hún er drottningin í sínu sporti. Hún er líka bara mjög dugleg að vinna með þessa miðla,“ segir Snorri um Katrínu Tönju Davíðsdóttur sem er með 653 þúsund fylgjendur á Instagram og bætti hún við sig tvö þúsund fylgjendum bara í gær.

„Það er alltaf nóg efni hjá þessu liði. Þau eru alltaf að æfa og kannski mikið að hitta fólk sem er frægt í senunni. Á hverjum einasta degi hefur þetta fólk eitthvað að segja, og fólk sem hefur áhuga á crossfit vill fylgjast með.“

Í efsta sætinu er Fjallið, Hafþór Júlíus Björnsson sem er með 673 þúsund fylgjendur.

„Hann er alltaf að leika, hitta fræga og hefur bara svo margar leiðir til að deila efni. Umfram allt er hann að pæla í þessu.“

Hér að neðan má sjá listann í heild sinni og þar fyrir neðan er umræðan úr Brennslunni.

Topp 10 Íslendingarnir á Instagram

1. Hafþór Júlíus Björnsson - 672 þúsund fylgjendur



2. Katrín Tanja Davíðsdóttir  - 635 þúsund fylgjendur

3. Björk Guðmundsdóttir - 543 þúsund fylgjendur

4. Annie Mist  - 532 þúsund fylgjendur

5. Sara Sigmundsdóttir - 488 þúsund fylgjendur



6. Sara Heimisdóttir - 133 þúsund fylgjendur

7. Gunnar Nelson - 131 þúsund fylgjendur



8. Halldór Helgason - 110 þúsund fylgjendur

9. Margrét Gnarr -85 þúsund fylgjendur

10. Gylfi Sigurðsson - 80 þúsund fylgjendur